A plataforma en liña Keweno chega xa aos 2.500 restaurantes en 35 países
martes, 27 de outubro do 2015
A
aceleradora internacional Telefónica
Open Future, na que se insire Galicia
Open Future, segue a achegar información sobre os logros das
súas “aceleradas”. Agora é a quenda de Emtrics,
firma madrileña acelerada por Wayra (Telefónica Open Future), que
vén de anunciar que a súa plataforma de enquisas privadas na nube
para o sector da hostalaría, de nome Keweno,
superou xa a liña dos 2.500 restaurantes acubillados (locais
espallados por 35 países, sendo a previsión chegar aos 3.000 en
máis de 40 países co remate de 2015). Aos clientes, Keweno
posibilítalles cousas como coñeceren as opinión dos usuarios
respecto dun restaurante, de xeito anónimo e dende o aparello móbil.
Aos
hostaleiros, permítelles recibir en tempo real as notificacións e
comentarios para a súa valoración e análise, achegándolles a
posibilidade de contactar cos propios usuarios do servizo, se así o
permiten estes,
para responder os seus comentarios,
Ademais
de en España e Latinoamérica, Keweno tamén está presente países
como Estados Unidos, India, Canadá, Irlanda, Francia, Alemaña,
Suráfrica, Sri Lanka, Illas Mauricio, Tailandia e Maldivas. Desde o
seu lanzamento os clientes dos restaurantes responderon a máis de 1
millón de preguntas e recibíronse máis de 100.000 comentarios.
Keweno conta na súa carteira de clientes con marcas como Melia
Hoteis, Fosters Hollywood, Ribs, Tony Romas, Dominos Pizza, La Vaca
Argentina, Hamburguesa Nostra, Pans & Company ou Cañas y Tapas.
Segundo
apuntan os creadores da plataforma, “Wayra axudounos en moitas
fases do proxecto, tanto na definición e validación inicial do
mesmo, como na procura de financiamento e socios comerciais, o que se
traduciu na captación de máis de 250 restaurantes mensuais que nos
permitirán máis que quintuplicar o número de establecementos que
tirarán partido da nosa ferramenta nos vindeiros 3 anos”. Emtrics
tamén anunciou a incorporación de novas facilidades, como a
posibilidade de incluír unha comparativa con outros restaurantes co
mesmo tipo de comida ou que estean emprazados na súa zona
xeográfica, “o que ofrecerá aos hostaleiros maior información
sobre o seu negocio fronte á súa competencia máis directa”.