A plataforma de eAdministración da Deputación de Pontevedra inicia nova andaina, logo de ter creado máis de 15,5 millóns de e-documentos

A Deputación de Pontevedra e os concellos da provincia veñen de xuntar forzas para dar un novo paso conxunto en materia de Administración Electrónica, ou sexa, a prol de todos aqueles sistemas, servizos e tecnoloxías que redunden nun mellor servizo á cidadanía, máis seguro, participativo, integrador, accesíbel, próximo, inmediato, eficiente e respectuoso co medio ambiente. Froito deste obxectivo común, a entidade provincial acordou coas 53 entidades locais pontevedresas, adheridas á plataforma de eAdministración, renovar até finais de ano o contrato deste servizo. A través deste xa se crearon máis de 15 millóns e medio de documentos electrónicos.
Amais, tamén decidiron iniciar un novo concurso para o próximo 2021 que dea cobertura cobertura a todas as melloras que foron poñéndose en práctica, cun investimento de máis de medio millón de euros.
Balance de actividade
Na formalización do acordo entre a Deputación e os concellos déronse unha serie de datos de interese sobre a actividade da dita plataforma de eAdministración ao longo destes catro anos: un recurso até o de agora de balde que se converteu, en palabras da entidade provincial, “nunha ferramenta fundamental para que o 100 % das entidades locais da provincia teñan a capacidade de ofrecerlle á súa veciñanza unha Administración máis próxima e moderna”.
Na cita engadiuse que a plataforma dá servizo a 53 concellos e mancomunidades adheridas e que presenta “un balance sobresaínte”, con “máis de 15 millóns e medio de documentos electrónicos creados e máis de 2,5 millóns tramitados con sinaturas electrónica”.
Ademais, o Goberno provincial explicou que “tan só nesta etapa da COVID-19, máis de 6.000 traballadoras e traballadores dos concellos puideron teletraballar grazas a esta plataforma da Deputación”, que permitiu aos gobernos locais celebrar plenos e xuntas de Goberno, sesións telemáticas, reunións ou mesas de contratación a distancia.
Alén de todo o devandito, para que os municipios asumiran con total garantía a atención cidadá nas novas circunstancias, a Deputación implantou a través da Sede electrónica o sistema de cita previa nos concellos para contactar coas oficinas municipais de xeito presencial ou por videoconferencia.
O acordo polo miúdo
Na formalización do acordo deste xoves 16 de xullo determinouse que a institución amplíe ata finais de ano o contrato do servizo e, ante a remate do contrato coa empresa Gestiona, inicie para o próximo 2021 a tramitación dun novo concurso. O obxectivo, tal e como trasladou o deputado Carlos Font, é “seguir apostando polo mundo local e manter o plan provincial en vez de que cada concello se faga cargo en solitario do custo da contratación da Administración Electrónica”.
Así, a Deputación asumirá o 75 % do novo contrato, que acollerá as melloras que foron implementándose e que suporá un investimento de máis de medio millón de euros (560.500 €). Pola súa parte, os concellos asumiran o 25 %, que se repartirá con criterios obxectivos por tramos de poboación.
Entre as novas prestacións do novo contrato figuran a integración coa Plataforma de Contratación do Estado (PLACE), a xestión documental do arquivo electrónico único e a integración cos servizos da Plataforma de Intermediación de Datos.