A planta de PSA Peugeot Citroën en Vigo recibe a visita dunha delegación do COETG-AETG
martes, 1 de marzo do 2016
Este luns 29 febreiro unha
delegación de membros do Colexio Oficial e a Asociación de
Enxeñeiros de Telecomunicación de Galicia (COETG-AETG) visitou as
instalacións en Vigo da factoría PSA Peugeot Citroën. A
actividade foi organizada polo propio COETG/AETG como “continuación
das accións de carácter tecnolóxico que se organizan de maneira
periódica” dende a entidade profesional galega. O grupo de
enxeñeiras e enxeñeiros foi recibido por Luis Babarro, responsábel
de Sistemas da factoría, quen realizou unha presentación da planta
achegando datos sobre o volume de coches fabricados, o número de
traballadores e o posicionamento da fábrica respecto doutras a nivel
internacional no referente a volume de fabricación e innovación
tecnolóxica.
A continuación os representantes do COETG-AETG e de
PSA Peugeot Citroën fixeron un percorrido polas instalacións do
fabricante automobilístico seguindo a cadea de produción. Grazas a
este itinerario, os enxeñeiros de Telecomunicación puideron
visualizar a construción dun vehículo en todas as súas fases:
ensamblado e montaxe, loxística e controis de calidade, entre
outras. Con posterioridade á visita da fábrica os asistentes
recibiron varias charlas expositivas sobre os últimos avances
tecnolóxicos no sector da motor: os sistemas de comunicación e o
coche conectado.
