A party Galaecia.net quece motores de cara á data de apertura, o 14 de setembro

A Asociación Sil, organizadora da festa informática máis soada da comarca do Salnés, Galaecia.net, quece motores e ultima detalles para que o vindeiro venres 14 de setembro ás 12 do mediodía non falte de nada á hora de abrirlles as súas portas ós asistentes. Un ano máis, este encontro informático adiántase ó comezo do curso académico, achegando novas seccións e contidos sobre informática e novas tecnoloxías para que o remate do verán lles deixe un bo sabor de boca ós participantes antes de volver á rutina diaria.
Nesta edición, a Galaecia.net cambia de local e vaise celebrar no pavillón da Rúa Castelao nº 13, lugar ó que terán que achegarse os festeiros cos seus propios equipos informáticos e coa arela de intervir na completa listaxe de charlas, obradoiros, concursos, sorteos e diversión programada e asegurada durante 3 días.
O aforo da Galaecia deste ano aumentou en 100 prazas, dispoñibles todas elas para mozos e mozas da bisbarra, de Galiza e de España, que poden acudir cos seus equipos totalmente de balde e sen rexistrarse previamente. Amais de xogos en rede, concursos, sorteo de agasallos, música en directo, obradoiros, xogos de rol, demostracións, trucos, solucións e algunha que outra sorpresa, os integrantes de SIL recomendan sobre todo a participación no Frets On Fire, un certame no que se convida ós concursantes a emular ós seus guitarristas favoritos perante a multitude e facendo alarde do seu talento musical.
Os relatorios programados para esta edición son os seguintes:
Venres 14 de setembro
- LAMP, Linux, Apache,Mysql, Php.
- Obradoiro de construción dun joystick caseiro.
- Instalación e configuración de un servidor de Lineage.
- Sistemas UNIX. Fundamentos básicos e avanzados.
Sábado 15 de setembro
- WIFI. Introdución, seguridade e obradoiro de antenas.
- Virtualización de Sistemas.
- Obradoiro de creación de patróns para bordados con software.
- Instalación de un servidor VoIP Asterisk.
- Servidor Linux integrado con Active Directory.
- Recomendacións para internautas.
- Musix, Distribución Linux para músicos 100% libre.
Domingo 16 de setembro
- Configuración de un servidor de comunicacións baixo Linux.
- Obradoiro de retoque con Photoshop.
- Relatorio de seguridade por Bitdefender