A operadora R amosa en Ourense a súa estratexia en materia de competencias horizontais
luns, 16 de abril do 2012
A semana pasada, o Campus de Ourense acolleu
unha actividade formativa que se ben non ten relación directa cos temas a
tratar en Código Cero, serviu para amosar en todo detalle a experiencia laboral
e humana dunha das empresas galegas máis importantes do sector das novas
tecnoloxías e as comunicacións: o operador R. A andaina da firma con sede na
Coruña en materia de motivación no traballo ficou ao descuberto este venres no Curso de
Competencias Horizontais, que contou coa presenza de Santiago
Vázquez, director de Persoas de R. Segundo fixo saber, a felicidade no eido de
traballo é un dos grandes piares sobre os que debe descansar o éxito dunha
empresa.
O curso contou tamén coa participación de
María Lameiras, vicerreitora do campus de Ourense; Ernesto Pedrosa, presidente
do Consello Social da Universidade de Vigo; Ignacio Armesto, director da Área
de Emprego da Universidade; e Alberto Vaquero, director da Área de
Descentralización do campus de Ourense. A actividade serviu entre outras cousas
para identificar os moitos puntos de actividade nos que un grupo diverso de
persoas, os traballadores dunha empresa, pode achegarlle beneficio e
rendibilidade á propia empresa. Deste xeito, puxéronse de manifesto cualidades
como a intelixencia emocional (que pode ter as mesmas vantaxes, ou máis, que a
racional), a motivación, a capacidade de comunicar ou a capacidade para sermos
líderes.
Foi precisamente o director de Persoas de R
quen abriu a quenda de relatorios, baixo o epígrafe O sentido do traballo,
facendo fincapé na importancia de “pensar
no traballo como unha fonte de felicidade, porque cando te gusta o teu traballo
xa non tes que ir a traballar”. Na súa opinión, é fundamental para o éxito
dunha empresa que se lle atope, sentido, no seu seo, ao desenvolvemento
profesional. Isto, sinalou, pode ter efectos moi positivos no rendemento
laboral e, tamén, na propia felicidade dos traballadores. En base a isto, o
pulo á intelixencia emocional é unha estratexia a ter moi en conta, xa que nun
posto de traballo o éxito depende nun 66% desta metodoloxía, e, pola contra,
nun 34% do coeficiente intelectual propiamente dito.
Logo desenvolveuse unha mesa redonda, Análise
das competencias horizontais máis valoradas nos sectores produtivos galegos,
que contou coas intervencións de Carlos Pena, responsable de Recursos Humanos
de Pérez Rumbao; María José Fernández, directora de Persoal de Grupo Cuevas;
Carlos Suárez, director xerente e conselleiro delegado de EDISA, e Santiago
Taunton, director de Recursos Humanos de Coren.