A nova versión da Libon Voicefeed engade múltiples e útiles funcionalidades
mércores, 25 de abril do 2012
As persoas que viñan usando
o que os seus desenvolvedores deron en chamar “buzón de voz intelixente”, é dicir, a aplicación para iPhone, Libon
Voicefeed, que permitía deixar unha mensaxe de voz no contestador automático
que variaba en función de quen fose a chamada entrante, xa teñen á súa disposición
(na App
Store) a última actualización desta aplicación, a versión 1.9, que entre
outras cousas permite deixar un saúdo específico para as chamadas de números
ocultos ou descoñecidos.
A nova versión permite non
contestar a esas molestas e inoportunas chamadas de call centers ou números ocultos, que en ocasións provocan o enfado
considerable da persoa usuaria e a perda de tempo se resulta ser unha chamada
de escaso ou nulo interese.
Ademais, se o iPhone quedou
sen batería ou o usuario o esqueceu na casa, este poderá igualmente consultar as
chamadas ou SMS recibidas grazas a un código de acceso que proporciona a
aplicación, e que permite acceder dende outro iPhone ou dispositivo con
conexión a Internet, de maneira que ofrece a oportunidade de escoitar as
mensaxes e responder ás chamadas que sexan importantes sen agardar a ter
operativo o noso iPhone.
A maiores, a aplicación
permite agora saber que outros contactos da axenda a están a usar e poder gozar
así de Libon Chat, un sistema de
mensaxería instantánea que inclúe a aplicación de balde para interactuar con
amigos ou familiares.
A estas novas
características hai que engadirlle as que xa incluía a antiga versión, que permiten
personalizar as mensaxes do contestador segundo chame o xefe, a moza ou mozo,
un amigo ou a avoa, por poñer un exemplo.
A aplicación segue a estar
dispoñible en dúas versións: de balde e Premium, esta última ten un custe de
7,99 euros ao ano e a maiores da gratuíta ofrece un número ilimitado de grupos
con saúdos personalizados; máis opcións de voces para ler as mensaxes de xeito
automático; almacenamento ilimitado de todas as mensaxes de voz e notificacións
enviadas ao correo electrónico do usuario co MP3 da mensaxe de voz recibida.