A iniciativa galega Enelatril proclámase gañadora do YuzzDay 2016
martes, 10 de maio do 2016
- A creadora do proxecto Enelatril logo de recoller o seu galardón en Santander
A start-up galega
Enelatril vén de proclamarse gañadora no
certame #YuzzDay 2016, onde obtivo o primeiro premio. Recibiu o
galardón a creadora da iniciativa, Andrea Aguilella Merelas, do
centro Yuzz Santiago de Compostela. Andrea conseguiu impoñerse entre
máis de medio milleiro de emprendedores de todo o ámbito estatal,
que se deron cita no YuzzDay celebrado en Santander, un evento
inserido no programa Yuzz que coordina CISE co mecenado de Banco
Santander, a través de Santander Universidade, sendo os partners
oficiais do Centro Yuzz Santiago a Universidade compostelá (a USC) e
máis a Secretaría Xeral de Emprego da Xunta de Galicia. A xornada
contou cun mercado de ideas, espazos maker, presentacións,
demostracións e unha manchea de actividades de traballo en rede para
mozas e mozos emprendedoras/es de toda España.
A creadora da iniciativa
finalmente recoñecida é, como dixemos, a enxeñeira industrial
Andrea Aguilella Merelas. Resultou a gañadora do concurso Este é
o meu pitch co proxecto Enelatril, unha ferramenta nun primeiro
paso presentada como unha aplicación e que se dirixe a permitir a
preparación útil e eficaz de presentacións e relatorios para falar
en público. O proxecto Enelatril foi seleccionado previamente como
unha das mellores iniciativas entre as máis de 500 propostas
emprendedoras que se deron cita no sexto Encontro Nacional Yuzz,
celebrado nesta edición na capital de Cantabria. Andrea Aguilella
defendeu o seu proxecto nun pitch de 30 segundos sobre o
escenario e tivo unha caseta para explicar a súa idea aos asistentes
ao evento. A iniciativa de seu recibiu finalmente o recoñecemento do
público, da organización e dos patrocinadores do evento, obtendo
como premio unha viaxe a Silicon Valley.
No evento, entre outros
persoeiros do ámbito público autonómico e do emprendemento,
participou o presidente de Cantabria, Miguel Ángel Revilla, quen
asistiu acompañado por Ángel Pazos, reitor da Universidade de
Cantabria; Federico Gutiérrez-Solana, director de CISE, e José
Antonio Villasante, director xeral de Banco Santander e de Santander
Universidades, quen animou a que outras cidades acollan vindeiras
edicións destas xornadas de networking para mozos
emprendedores. Segundo fixeron saber o gran obxectivo do YuzzDay é
“fortalecer ligazóns de colaboración entre participantes,
profesionais e mentores de toda España”. Ademais, sinalaron,
fornece aos seus participantes a oportunidade de crear sinerxías e
coñecer a traxectoria de emprendedores de primeiro nivel nunha
contorna de innovación, creatividade, tecnoloxía e emprendemento.
O evento contou cos
espazos de 10 UpCorners, un mercado de ideas no que dez
emprendedores -elixidos entre máis de 900 participantes de toda a
contorna estatal- tiraron partido dunha caseta para vender o seu
proxecto e obter “financiamento ficticio” (Yuzzo$) dos
asistentes, que durante esta xornada convertéronse en business
angels.
Os 3 proxectos que
recibiron maior investimento pasaron ao final pitch, onde
foron expostos nos seus detalles fronte a un tribunal de expertos.
Este tribunal decantouse finalmente por Enelatril, aplicación creada
por Andrea Aguilella do Centro Yuzz Santiago de Compostela, como
gañadora da viaxe a Silicon Valley.
Os outros dous finalistas
recibiron 400 euros para continuar desenvolvendo os seus proxectos:
Lotness, unha start-up que desenvolve unha nanotecnoloxía que
impide que os tecidos se manchen (impulsada por Daniel García do
Centro Yuzz Universitat de València); e X-Migrations, unha
plataforma que fomenta o turismo ecolóxico (ideada por Manuel Rafael
Elena do Centro Yuzz Murcia).
Pola tarde, os mozos
puideron ser protagonistas na zona maker, un espazo adicado á
impresión 3D, ao desenvolvemento de aplicacións móbiles, á
xeración de prototipos, á robótica e á realidade virtual.
Ademais destas actividades, o evento contou con relatorios a cargo de
expertos como Leandro Fernández Macho, director de Neurozona; Amparo
de San José, Business Angel e directora da rede de investidores de
IESE; Simón Menéndez Sardonil, responábel de educación de Ashoka
España, e Ana Borrego, directora de dominio de emprendemeento na
área corporativa de innovación de Banco Santander.