A industria intelixente do mundo pon a vista na nova edición das JAI, na UVigo
martes, 15 de novembro do 2022
Vigo
está estes días (até o venres 18 de novembro) no punto de mira de
todas as persoas que e adican a investigar, en Galicia, España e
Europa, con tecnoloxías intelixentes que nos axudan a producir
mellor e máis eficientemente, de forma máis racional e rendíbel e
respectuosa co medio ambiente. O motivo é a oitava edición das
Xornadas de Automatización
Industrial (JAI) da Universidade de Vigo, impulsadas unha vez
máis polo profesor e investigador Ignacio Armesto. Este
luns arrincaron as actividades con máis de 1.000 persoas rexistradas
e 125 empresas participantes. O programa inclúe medio cento de
conferencias.
Inauguración
oficial
A
inauguración oficial tivo un escenario duplo: primeiro, nun ateigado
salón de actos da Escola de Enxeñaría de Telecomunicación, coa
intervención de múltiples autoridades e, a continuación, no
vestíbulo central da Escola de Enxeñería Industrial, onde, como xa
é tradicional, instalouse a sala de demostracións Industria 4.0, na
que as empresas participantes, máis de 35 firmas moi recoñecidas no
sector, realizaran exhibicións das últimas tecnoloxías en
automatización e robótica.
A
inauguración das xornadas, presidida polo reitor da Universidade de
Vigo Manuel Reigosa, deixou patente a necesidade de transformar
tecnoloxicamente a industria. “Estamos a vivir unha oportunidade e
un momento histórico para Galicia e para España”, subliñou o
reitor, facendo fincapé en que, se ben, “perdéronse moitos trens
ao longo da historia, por cuestións xeográficas ou administrativas,
nestes intres hai a oportunidade de estar en primeira liña, entre
outras cousas, polo poderoso vento que chega de Europa, en forma de
financiamento”. Centrándose no caso concreto de Galicia, o reitor
fixo fincapé en que se levan moitos anos facendo os deberes e
cóntase con “tres boas universidades”, que lanzan ao mercado
talento moi ben formado “que pode competir con calquera persoa do
mundo”, pero que, “a maiores”, estase facendo o esforzo de ir
por diante.
Á
boa formación das enxeñeiras e enxeñeiros formados en Vigo fixo
tamén mención o conselleiro de Cultura e Educación, Román
Rodríguez, quen coincidiu co reitor en afirmar que a sociedade vive
un “cambio de paradigma a todos os niveis” e, dentro deste
cambio, un dos vectores que mellor o representan é o continúo
desenvolvemento tecnolóxico. “Nesa liña, xornadas como estas
poñen de relevo as boas sinerxías que resultan da unión entre o
mundo educativo e o profesional”.
Con
emisión en directo a través da canle1
de UVigoTV, a 8ª edición das JAI achega múltiples novidades no
seu programa, incluídas catro mesas redondas, dúas moderadas por
ISA Spain e as outras dúas por AER Automation, centradas en
ciberseguridade, mantemento preditivo, robótica móbil e visión e
Intelixencia Artificial; unha gran exposición de robótica, co
dobre de participantes que na derradeira edición, e a presenza de
Spot Enterprise de Boston Dynamics, o cuadrúpedo co brazo máis
avanzado do momento. Así mesmo, varias firmas patrocinadoras e
participantes amosarán ao longo de toda esta semana os seus robots
máis avanzados, nos eidos colaborativo, sensitivo e móbiles
autónomos, principalmente. Ademais este ano cobran especial
protagonismo neste showroom as asociacións de estudantes como
UVigo SpaceLab ou UVigo Motorsport.
Amais,
segundo salientan dende a organización, ao longo destes cinco días
superaranse as 40 horas de conferencias e mesas redondas, impartidas
por 70 profesionais, que abordarán nos seus relatorios cuestións
como infraestruturas críticas, monitoraxe e control, ciberseguridade
industrial e zero trust, xemelgo dixital, Intelixencia
Artificial, analítica de datos, industria de proceso, etc.