A galega Tórculo reforza o seu servizo con alta tecnoloxía de HP

A galega Tórculo Artes Gráficas vén de reforzar o seu catálogo de servizos. E fíxoo a través da instalación na sede de Santiago de nova tecnoloxía de impresión, entre a que se inclúe unha HP Indigo Press 5000 de sete cores, destinada a “ofrecer produtos de alta calidade entregados en pouco tempo para unha crecente gama de aplicacións”, segundo apunta a firma galega.
A posta en marcha deste prelo dixital, que leva a cabo o traballo para a base de clientes de Tórculo (entre os que se inclúen administracións e universidades), permitirá ampliar o abano de destinatarios e de servizos, achegando novos produtos como books de fotos. Segundo comenta Jacobo Bermejo, director xeral de Tórculo, a empresa está a botar man da Indigo Press 5000 para levar a cabo dixitalmente preto da metade dos traballos de impresión, sobre todo grazas á súa versatibilidade.
E prosegue: “A impresión dixital e convencional desenvólvese de xeito paralelo e agora temos a capacidade de realizar traballos curtos así como traballos litográficos offset longos, o que quere dicir que podemos ofrecerlles ós clientes un mellor servizo e máis opcións”.
Entre os traballos feitos até o de agora tirando partido da versatibilidade do prelo, inclúese un catálogo de moda con páxinas sobre diferentes substratos (tarxeta, pergamiño e papeis recubertos) e rematouse na empresa cunha encadernación en tela.