A galega Televés amosará en Andina Link a súas solucións para redes de TV
venres, 27 de febreiro do 2015
A compañía
galega Televés participará un ano máis na feira Andina Link,
en palabras da empresa compostelá “unha feira de referencia no
mercado latinoamericano dos servizos de televisión e
telecomunicacións”. A participación neste evento, que terá lugar
na cidade colombiana de Cartaxena de Indias o 3,4 e 5 de marzo, pon
de manifesto “a consolidación da compañía no mercado de
Latinoamérica”, sinala Televés, que exporá entre outras cousas
as súas novas e avanzadas solucións para redes de televisión e
datos de alta velocidade.
Segundo apunta a empresa
galega, o potencial da tecnoloxía que vai amosar en Andina
Link é moi amplo e interesante para os países da contorna. De
feito, di, este mercado está arestora implantando con éxito a
Televisión Dixital Terrestre (TDT) e atópase mergullado, tamén, na
incipiente hibridación cara a redes de acceso ultrarrápido, con
servizos de televisión, telefonía e datos de alta velocidade”.
Por certo que no caso de Colombia, que é o país anfitrión da
feira, xa é posíbel “falar da implantación contrastada da
regulamentación específica sobre Redes Internas de Comunicacións
(RITEL)”, explica a empresa galega, que terá unha “situación
privilexiada” na caseta 45 área B da devandita feira
latinoamericana.
Nun plano máis
detallado, Televés amosará tecnoloxías innovadoras para sistemas
colectivos de captación e distribución de sinais de televisión
para redes de cable, edificios, hoteis, hospitais, mineiras,
etcétera. Ou sexa, darase conta dos últimos achados para a
dixitalización de redes de cable cos novos Encoders e
Transmoduladores para alta definición (HD) en QAM, DVB-T/T2 e
ISDB-Tb.