A galega Krasis lanza un libro sobre SignalR de repercusión internacional
mércores, 20 de marzo do 2013
Entre os desenvolvementos
recentes de Microsoft salienta un servizo que responde, curiosamente,
máis ás metodoloxías de traballo das empresas open source cás
dunha multinacional representante do software privativo como é a
firma de Redmond. Falamos de SignalR, biblioteca de balde, aberta,
que permite crear aplicacións web multiusuario, asíncronas e en
tempo real. Pois ben, este servizo e as súas potencialidades,
segundo informa a empresa galega Krasis, poden dar moito que falar.
Para desvelar as súas posibilidades e funcionamento, a editorial
Krasis (a través do seu selo CampusMVP) vén de publicar un libro (en formato e-book) de José María Aguilar, traducido
xa ao inglés e amosando un fito a ter en conta: máis de 4.000
descargas nun período de dúas semanas.
Segundo nos contan dende a
firma galega, este éxito tivo en boa medida a súa raizame no
interese amosado por David
Fowler e
Damian Edwards, creadores da
devandita biblioteca e
membros do
equipo de ASP.NET en Microsoft. O
seu interese traduciuse en recomendacións diversas en diferentes
canles e xuntanzas, incluíndo as redes sociais de meirande uso, onde
fixeron fincapé no libro Introdución
a ASP.NET SignalR.
Deste xeito, informa Krasis Press, “en
poucas horas iniciáronse as descargas da versión en inglés da obra
nos cinco continentes en lugares tan dispares como Belice, Australia,
Congo ou Madagascar”. Amais
do aval de Fowler e Edwards, cómpre engadir outro detalle que
contribuíu ao éxito da publicación: a súa calidade. Así nolo
explica José Manuel Alarcón, editor de Krasis Press: “Cheo
de explicacións intelixentes e claras, este libro sobre SignalR, o
primeiro publicado no mundo tanto en inglés como en español, é
algo que sen dúbida debemos ter a man para crear aplicacións fóra
do común”,
sinala. Como dixemos, o libro foi escrito polo español José María
Aguilar, quen describe nel as principais características desta
biblioteca e os diferentes niveis de abstracción que ofrece sobre os
protocolos subxacentes. Tamén inclúe exemplos (descargábeis de
balde) que axudan aos desenvolvedores a entender os seus alicerces e
coñecer o emprego básico deste framework
en
proxectos. Asemade, avalía a independencia de SignalR dos contornos
web, o que fai posíbel que poida ser acubillado en calquera tipo de
aplicación, e que os servizos en tempo real se consuman dende todo
tipo de sistema.