A galega Imatia, entre as empresas máis innovadoras de Europa
xoves, 3 de maio do 2012
- Fernando Vázquez no acto de entrega das distincións en Ámsterdam
A spin-off da Universidade de
Vigo, Imatia, fundada no 2005 para cubrir as necesidades tecnolóxicas que
presentaban por aquel entón as empresas do país, non deixou este tempo de
apostar pola innovación en todo momento, unha cualidade entre outras moitas que
a levaron a figurar no TOP 100 das empresas tecnolóxicas europeas
máis innovadoras, xunto con outras seis firmas españolas.
Esta listaxe,
elaborada dende hai 16 anos pola prestixiosa editorial Red Herring, tivo nesta
edición “unha competencia máis forte ca
nunca”, segundo apuntou o responsable da rede, Alex Vieux, polo que o logro
de Imatia ten, se cabe, máis mérito do que lle poderíamos dar nun primeiro
momento.
En palabras
do responsable do TOP, “Imatia Innovation reflicte a visión, o
empuxe e a innovación que definen un proxecto empresarial con éxito”, características que a fixeron meritoria de aparecer
nesta lista de referencia mundial na que, ademais da innovación, valóranse as
iniciativas con máis carácter emprendedor e desenvolvemento de futuro.
Algunhas das máis importantes
firmas tecnolóxicas do mundo como Facebook, Skype, YouTube ou eBay, entre
outras, xa formaron parte desta listaxe en edicións anteriores, o que supón un
exemplo máis da importancia do logro acadado por Imatia.
En total, segundo
podemos ler no DUVI, “para a edición
de 2012 presentáronse 2000 compañías, das que foron seleccionadas 200. Estas
finalistas participaron nun encontro a pasada semana en Amsterdam, do que
saíron as elixidas que conforman o TOP 100” .
Esta listaxe de referencia avalía
cada un dos 2000 candidatos segundo criterios cuantitativos e cualitativos,
atendendo tanto aos resultados financeiros como á innovación tecnolóxica, a
calidade da xestión, a estratexia ou a penetración no mercado.
Estas e outras características,
así como a traxectoria da empresa e o seu posicionamento en relación ás
competidoras, foron as características que levaron a Imatia a figurar no Top
deste ano por méritos propios.
Imatia
Innovation na final do TOP 100 de Estados Unidos
A todo isto hai que engadirlle
que Imatia tamén foi seleccionada para participar durante este mes de maio na
fase final do TOP 100 dos Estados Unidos, que terá lugar en Los Ángeles e onde,
malia tratarse da edición americana, a galega acudirá como convidada xunto con
outras 14 empresas europeas.
De alí, o director xeral de
Imatia, Fernando Vázquez, pretende volver “cunha
chea de experiencias, contactos e consellos”, como tamén trouxo de
Amsterdam, onde o animaron a “seguir
crecendo e expandíndose”.
Da capital holandesa tamén
trouxeron xa varias alianzas tanto con outras empresas como con entidades de
capital risco, e a intención de Vázquez é facer o propio nos Estados Unidos,
onde ten pensado “abrir mercados e
procurar parceiros entre as empresas con máis futuro do país”.