A galega Igalia únese ao proxecto Tizen para a creación dun novo sistema aberto para dispositivos
venres, 15 de novembro do 2013
Igalia, compañía
coruñesa centrada en achegas de software libre, anunciou
que vai colaborar directamente no proxecto Tizen, e farao en
calidade de socia desta plataforma-comunidade integrada por 35
membros implicados no desenvolvemento e despregue do sistema
operativo do mesmo nome (Tizen). Este proxecto Tizen,
informa Igalia, é un consorcio industrial que centra os seus
esforzos en dar forma á dita ferramenta operativa e en asegurarlle a
esta unha ampla gama de posibilidades en dispositivos conectados.
Como socia desta alianza, a empresa galega terá a oportunidade de
unirse a “relevantes grupos de traballo” e participar arreo nas
reunións da asociación, dando a compañía novos azos (ideas,
empuxe) ao desenvolvemento do sistema.
Lembrar que Tizen xunta
hoxe en día a algunhas das máis importantes e innovadoras compañías
de desenvolvemento de produtos, aplicacións e servizos informáticos,
todas elas traballando a prol do crecemento do ecosistema de
dispositivos conectados.
Tizen, para quen non o
saiba, basea en Linux o
seu proxecto de desenvolvemento, e de feito toda a iniciativa
está patrocinada por Linux Foundation e a Fundación Limo. Ten a súa
orixe en MeeGo, que á súa vez foi unha combinación dos sistemas
operativos móbiles Moblin, creado por Intel, e Maemo, creado por
Nokia, e está destinado a substituílo. O desenvolvemento está
dirixido por Intel, Samsung, e algúns antigos desenvolvedores de
MeeGo.
As interfaces de
desenvolvemento de Tizen están baseadas en HTML5 e outros estándares
web e será deseñado para o seu uso en tablets, netbooks,
smartphones, televisores intelixentes e sistemas integrados de
información e entretemento. Os membros do equipo directivo técnico
actual declararon que o froito deste traballo será totalmente
aberto.