A galega Femxa xestionará a Universidade Online de Prosegur en Perú
luns, 28 de abril do 2014
- Patricia García, presidenta institucional do Grupo Femxa
A empresa galega Grupo
Femxa ten novos partes informativos sobre a actividade de seu,
logo de dar a coñecer a
nova da contratación de 200 mozas e mozos para reforzar o seu
papel de empresa referente a nivel estatal no eido da formación
laboral baseada en novos recursos e tecnoloxías. Porén, a nova
información ten relación con outro xeito de medrar: a busca de
novos mercados e escenarios. Segundo informa a firma galega, vén de
pechar varios acordos internacionais importantes, entre os que se
conta un asinado coa multinacional Prosegur. En virtude deste pacto,
Femxa xestionará a Universidade Online de Prosegur en Perú, “que
permitirá a milleiros de persoas adquirir os coñecementos precisos
para o seu traballo, sen ter que desprazarse”.
Segundo engade Patricia
García, presidenta da compañía galega especializada en formación
para o emprego e novas tecnoloxías, “o e-learning, amais de
ser a base deste novo acordo de Femxa, é sen lugar a dúbidas a
formación do futuro, debido á súa gran flexibilidade”. Ao seu
xuízo, esta modalidade de formación baseada no uso das novas
tecnoloxías está a revolucionar a nosa forma de aprender, e máis
tendo en conta a bagaxe formativa TIC que temos detrás: somos
lectores e usuarios habituais da información que nos chega polas
redes. Tendo en conta este feito e estes alicerces, sinala Patricia,
“en Femxa estanse a crear plataformas en liña que ofrecen unha
formación regulada, estruturada e profesionalizada”.
Hoxe en día, Grupo Femxa
xa formou a máis de 350.000 alumnos en varios países. “Nos
últimos anos fixemos un importante esforzo por chegar a
Latinoamérica e aos países emerxentes do leste de Europa”,
explica Patricia García á hora de situar este acordo con Prosegur
en Perú, unha alianza que vai permitir a 12.000 alumnos “a
obtención dunha aprendizaxe especificamente deseñada para eles”.
Na actualidade, Prosegur ten presenza en Asia (China, India e
Singapura); en Europa (Alemaña, España, Francia, Luxemburgo e
Portugal); en Oceanía (Australia) e en Latinoamérica (Arxentina,
Brasil, Chile, Colombia, México, Paraguai, Perú e Uruguai).