A firma compostelá Strelia Electrotecnia, Premio Manuel Beiras
luns, 16 de decembro do 2019
Finalmente
o palmarés da edición número 20 dos Premios Manuel Beiras,
convocados polo Concello e a Cámara de Comercio de Santiago para
salientar o compromiso comunicativo co galego das empresas locais
(tanto offline como nas redes), tivo un marcado cariz
tecnolóxico. De feito, a empresa do sector das telecomunicacións
Strelia Electrotecnia impúxose
como gañadora na categoría de uso continuado do galego. Tamén se
proclamaron gañadoras no certame a sala de cinema Numax
e a Agrupación
Folclórica Cantigas e Agarimos.
Os
datos foron
dados a coñecer pola concelleira de Políticas Lingüísticas, Noa
Díaz, e o vogal do pleno da Cámara de Comercio. Os galardóns
entréganse hoxe ás 20.00 horas no Teatro Principal, nun acto
presidido polo alcalde, Xosé Sánchez Bugallo, e o presidente da
entidade cameral, José Sierra.
Strelia
Electrotecnia foi a empresa gañadora na categoría de uso continuado
do galego. O xurado premiouna por “empregar o galego nun sector
empresarial innovador e dinámico como é o da electrónica de
telecomunicacións e industrial, no que desenvolve solucións de
electrónica profesional en campos como as telecomunicacións, a
oceanografía, as ciencias da terra, o control industrial e a
eficiencia enerxética”. Valorou especialmente que, “tendo en
conta que gran parte da súa clientela se sitúa fóra das nosas
fronteiras”, a súa escolla lingüística demostra que “o galego
serve para comunicarse, mais tamén para transmitir valores como o de
calidade, compromiso, seriedade e respecto pola diversidade natural,
social e cultural”.
Strelia
centra parte dos seus proxectos en eidos como os sistemas marítimos
de comunicación, os humidímetros, os sequeiros dixitais, o
alumeado, a agricultura intelixente ou o desenvolvemento de sistemas
innovadores de xestión de recursos marisqueiros e pesqueiros (por
exemplo a fabricación de prototipos e módulos electrónicos de
control e telemetría para sistemas náuticos ou agrícolas).
Na
modalidade de nova incorporación, o galardón recaeu en Numax
Sociedade Cooperativa, por “incorporar a lingua a un proxecto
empresarial que tiña tanto de arriscado como de atractivo e
innovador”. Para o xurado, Numax representa "un lugar onde o
galego comparte protagonismo coas historias que alí suceden".
Finalmente,
a distinción especial foi para a Agrupación Folclórica Cantigas e
Agarimos, porque “ao longo dos seus 98 anos de historia, diferentes
xeracións de compostelás e composteláns tiveron a oportunidade de
se formaren no coñecemento do folclore galego, polo que tamén se
converteron en coñecedoras e transmisoras do importante legado
lingüístico que este atesoura”.