A firma FirstV1sion achega tecnoloxía para poñernos nos ollos dos deportistas
martes, 4 de agosto do 2015
A nova firma de raizame española FirstV1sion,
acelerada a través da iniciativa Telefónica Open Future, ten entre
mans unha tecnoloxía que fai posíbel, en todo o senso da expresión,
poñermos como espectadores de acontecementos deportivos nos ollos
das e dos deportistas. A súa experiencia, precisamente, valeulle
para ser a encargada de retransmitir en primicia (a través da canle
Teledeporte) imaxes dos participantes no Campionato de España de
Atletismo (Castelló, esta fin de semana). Non serán unhas imaxes
calquera, senón que adoptarán, como dixemos, o punto de vista dos
competidores. Veremos, polo tanto, o que elas e eles ven.
Isto será unha realidade grazas a unha tecnoloxía
que capta e transmite a contorna que rodea ao deportista e que xunta
unha cámara de alta definición instalada na roupa dos participantes
cun sistema de transmisión RF profesional.
A concorrencia de FistsV1sion e a súa tecnoloxía
no devandito Campionato veu dada por un acordo acadado coa Federación
Española de Atletismo, “sendo a primeira vez na historia deste
deporte que os espectadores poderán gozar dun punto de vista tan
revolucionario”, informa Telefónica dende a súa palestra
empresarial Telefónica Open Future, na que se integra, por certo, o
centro galego de crowdworking Galicia Open Future, arestora
mergullado no impulso sa súa segunda edición.
Segundo engade a compañía, este tipo de
tecnoloxías non son estritamente novas (úsanse xa en Fórmula 1 ou
en MotoGP), porén, a novidade estriba en que é a primeira vez que
se aplican no ámbito do atletismo. Outro dos extras da experiencia é
que achega imaxes de calidade profesional, co fin de que non fique
detalle sen captar da actividade deportiva. FirstV1sion inclúe
características adicionais como son os sensores biométricos que
completan o deseño. As imaxes captadas pola cámara de FistV1sion
estarán dispoñíbeis na maioría das disciplinas do campionato:
velocidade, substitucións, valos, chimpos e lanzamentos. Os
primeiros atletas en probar a nova camiseta durante os adestramentos
foron Eduard Viles, o velocista de Mediona e actual plusmarquista
español e 9º do mundo en 4x100m, e o aragonés Alberto Gavaldá,
que foi medalla de prata nos mundiais xuvenís e campión de España
de 200m. Tanto Viles como Gavaldá tirarán partido da tecnoloxía no
Campionato de Castelló. Para quen queira afondar un pouco máis no
alcance destas experiencias, dicir
que xa hai accesíbel un vídeo explicativo no YouTube.