A figura de María Vinyals centrou o novo podcast de Aquí faltan páxinas
xoves, 27 de xullo do 2023
A
figura da aristócrata María Vinyals, que naceu e viviu longas
temporadas no castelo de Soutomaior, foi protagonista este mércores
do programa provincial Aquí faltan páxinas, un ciclo de
relatos sonoros dixitais e conferencias que naceu da colaboración da
Deputación de Pontevedra con O Cable Inglés, sendo o seu obxectivo
“divulgar a traxectoria de mulleres galegas extraordinarias”. A
deputada provincial Sandra Bastos participou na charla impartida pola
escritora Isabel Blanco nos xardíns do castelo.
Vinyals,
escritora, articulista, artista, conferenciante e sufraxista, naceu e
viviu no castelo de Soutomaior a finais do século XIX. Foi unha das
primeiras mulleres en formar parte da Real Academia Galega. Ademais
de protagonizar a conferencia nos xardíns do castelo a historia da
María Vinyals está tamén xa dispoñíbel no podcast Aquí
faltan páxinas (nas principais plataformas de streaming
de audio e no
sitio web da institución provincial) e a través dun roteiro
virtual que inclúe os lugares claves na biografía da protagonista,
centrado no castelo, que María Vinyals herdou do seu tío no ano
1908.
A
relatora Isabel Blanco baseou o seu faladoiro no seu ensaio María
Vinyals. Un talento rebelde (2018). Licenciada en Dereito pola
Universidade de Granada, exerce desde 1989 en Vigo como avogada
especializada en dereito matrimonial e de familia, e en violencia de
xénero e menores, actividade que combina coa súa paixón pola
escritura e a creación. Como creadora, promoveu as mostras Rompe,
xoga en igualdade (Deputación de Pontevedra, 2018); Amores
que matan non son amores (2018) coa dirección artística de
Irene Silva e Espazos roubados (Deputación de Pontevedra,
2021), así como o espectáculo Literarias, con Silvia Penas e
Mariana Carballal.
O
proxecto Aquí faltan páxinas inclúe unha antoloxía de 12
podcasts, un por mes, para pór en valor os logros de 12 grandes
mulleres relacionadas coa provincia: María Soliña, Elisa Patiño,
Olimpia Valencia, Maruja Mallo, Concepción Arenal, Antonina
Sanjurjo, María Vinyals, Ernestina Otero, Ángeles Alvariño, Isabel
Barreto, Carolina Otero e Sofía Novoa.