A fibra óptica de Telefónica xa está a disposición do 56% da poboación da Coruña
mércores, 5 de febreiro do 2020
Telefónica
vén de facer un novo balance do nivel de espallamento da súa fibra
óptica até os fogares (tecnoloxía FTTH, Fiber To The Home)
na nosa terra. Desta volta, tócalle
á provincia da Coruña, onde a dita tecnoloxía da operadora xa
chegaría, en palabras da compañía, ao 56% da poboación.
Este
fito, como o
máis recente relativo a Pontevedra, foi unha realidade grazas
aos máis recentes plans de colaboración público-privada para
situar a Galicia na vangarda das infraestruturas de
telecomunicacións, explica Telefónica, engadindo que a devandita
taxa do 56% supón un total de 444.526 vivendas e negocios con acceso
á fibra da operadora e unha suba do 11% con respecto ao exercicio
anterior (2018).
A
compañía engade que ao longo de 2019 sumáronse 45.151 novas
unidades inmobiliarias (vivendas, locais, negocios, empresas,
polígonos industriais, etc.) e a previsión é que este ano 2020 a
cobertura con FTTH chegue a 39.913 novas unidades (80 novas
localidades), completando a extensión de fibra nuns 800 núcleos,
moitos deles orograficamente complexos e dispersos, até alcanzar as
484.439 unidades inmobiliarias cubertas.
Recursos
propios e posibilidades
A
empresa lembra que o fornecemento de fibra óptica en Galicia
realizouse “con recursos propios e cos achegados polos programas de
axudas de extensión de banda larga das administracións autonómica
e central”.
A
fibra óptica permitirá aos usuarios de Telefónica ir incrementando
o uso de banda larga nos próximos anos “na medida que a progresiva
dixitalización das actividades particulares, profesionais e
empresariais así o esixa”, sinala a compañía, engadindo, no
capítulo de vantaxes e beneficios que se poñen en xogo con estes
equipamentos, “que a fibra óptica de Movistar ofrece voz con alta
calidade nas chamadas, máxima velocidade de conexión a Internet e
conectar varios dispositivos a Internet simultaneamente sen reducir
velocidade de conexión, entre outras vantaxes”. Ademais, se o
usuario dispón de Movistar+ terá acceso a canles de alta definición
co dobre de resolución que a TDT ou o DVD e poderá gozar dos seus
contidos mentres navega por Internet.