A fibra óptica de 100 Mbps achegada por R e AMTEGA chega antes do previsto a máis de un millón de galegos
luns, 16 de setembro do 2013
- Mar Pereira, directora de AMTEGA, e Arturo Dopico, conselleiro delegado de R
A
Axencia para a Modernización Tecnolóxica de Galicia, AMTEGA,
informou
estes días que máis
de un millón de galegos teñen acceso xa
á redes de fibra óptica de 100 Mbps,
en
virtude dos traballos desenvolvidos polo operador R ao abeiro do Plan
de Banda Larga da Xunta. A
Axencia tamén fixo fincapé na vontade descentralizadora destas
tarefas,
pois unha das liñas estratéxicas desta achega de
redes de
Nova Xeración (NGA) foi
a
de centrarse en
núcleos de máis de 500 habitantes, fóra das grandes cidades. O
Plan, desenvolvido pola Administración
autonómica en colaboración coa
compañía galega R, conta
cun investimento total de máis de 129 millóns de euros dos que a
Xunta achega o 20%. Segundo
explica AMTEGA, as redes de fibra óptica que atinxe a iniciativa de
despregamento son as máis avanzadas do mercado neste intre
e constitúen o alicerce do acceso
a novos servizos como o fogar dixital, a
computación na nube ou o teletraballo. “Trátase”, engade, “das
infraestruturas que soportarán o mundo dixital dos próximos anos e
condición indispensable para poder competir nun mundo globalizado”.
Para AMTEGA
tamén é importante lembrar que a devandita infraestrutura ao
servizo de máis de un terzo dos galegos chega medio ano antes do
previsto e dous antes a nivel europeo. De feito, estamos a falar de
redes de nova xeración para o 90,7% dos núcleos programados no
plan, un total de 175 poboacións de máis de 500 habitantes dos 193
incluídos na parte do PDBL que lle atinxe de cheo ao operador
galego. Segundo explica a Axencia, “sen
contar coa poboación das sete grandes cidades galegas (onde xa máis
de setecentas mil persoas teñen acceso ás novas redes), o obxectivo
marcado de que outras 575.000 puidesen gozar
destes servizos avanzados a peche de 2013 vén de superarse cinco
meses antes do previsto no Plan de Banda Larga”. Así,
tendo
en conta os 27 núcleos aos que se lles deu acceso en 2010, os 77 de
2011, os 47 de 2012 e os 24 que se levan activados no que vai de ano,
nestes momentos outros 594.721 habitantes de Galicia, de preto de
390.000 fogares e empresas, poden acceder ás vantaxes das redes de
nova xeración por vez primeira. Todos estes núcleos dispoñen
pois dun
acceso á rede dun mínimo de 100 Mbps
de baixada e 10 de suba e cun caudal garantido do 80%. E seguindo o
previsto, o
operador R continuará
a despregar a súa rede de fibra óptica para lles achegar aos
habitantes da comunidade servizos de 200 Mbps
ao longo tamén de 2013.
Para
a Axencia, é importante recordar
que, en base ao devandito, “Galicia
é unhas das primeiras comunidades
da Unión Europea que está a subvencionar a implantación de redes
de nova xeración, as máis punteiras do mercado, e seguindo o camiño
descrito, a finais de 2013 a metade da poboación galega (1,4 millóns
de persoas) disporá xa de acceso a redes de fibra óptica de
100Mbps, cumprindo con dous anos de adianto o obxectivo para 2015 da
Axenda Dixital para España”. En total,
engade o departamento que dirixe Mar Pereira,
serán máis de 200 núcleos de toda a nosa
xeografía
os que teñan acceso a estas infraestruturas “que permitirán
desenvolver modelos de negocio máis eficaces e eficientes, novas
formas de producir e comercializar produtos e servizos e diferentes
xeitos de comunicación entre cidadanía, empresas e
administracións”.
Cómpre
ter en conta, para facérmonos unha idea detallada do que significa
ter ao alcance da man estes servizos de R, que os accesos de 100 Mbps
van permitir, entre outras cousas,
contactar con persoas próximas do noso contorno ou con profesionais
da sanidade
e doutros eidos da administración simplemente acendendo a nosa tele
e premendo unha canle determinada. Ademais da televisión
interactiva, o fogar dixital, os servizos na nube ou o traballo
a distancia
figuran tamén na listaxe destes novos servizos vinculados ás redes
de nova xeración. A
nivel empresarial, tamén se abre un mundo de posibilidades,
lémbranos a compañía que dirixe Arturo Dopico, pois terán ao
alcance man unha gran potencialidade para desenvolver servizos
avanzados de telecomunicacións, “o que apunta
unha vez máis ao sector nas novas tecnoloxías e á innovación coma
un dos puntais da xeración de emprego en Galicia”.
Datos
sobre R
Entre
os anos 1999 e 2010 R desenvolveu un proxecto de construción dunha
nova rede de telecomunicacións por fibra óptica cun investimento
duns 800 millóns de euros e cunha cobertura total de máis de
800.000 fogares e empresas. Arestora, a extensión de redes de alta
velocidade de R xa é unha das actuacións máis importantes do Plan
de Banda Larga 2010-2013 (aprobada o 16 de setembro de 2010 no
Consello da Xunta). O apoio da administración autonómica a R
reforza o obxectivo de situar a Galicia á vangarda das
telecomunicacións para competir en Europa e no resto do mundo
despregando na comunidade estas redes de inxentes posibilidades e que
serán a base de servizos diferenciais e elementos imprescindibles
para o desenvolvemento empresarial e a xeración de emprego en
Galicia.