A evolución da crise obriga ao Carballo Interplay a achegarse integramente online
luns, 9 de novembro do 2020
- Sonia Méndez, directora do Carballo Interplay nunha entrevista recente para Ollodevidro.gal
A
sétima edición do festival de contidos en liña Carballo
Interplay, cuxo comezo está previsto este 18 de novembro,
achegará todas as súas actividades da Rede. Así o confirmaron as
entidades que organizan o certame (Interplay Producións e Concello
de Carballo), informando tamén de que esta transformación será
aproveitada como unha inmellorábel oportunidade para reflexionar
sobre as tecnoloxías que fan posíbel (precisamente) esta
transformación. En concreto, no festival analizarase “como as
tecnoloxías emerxentes converten festivais e espazos físicos en
contidos multipantalla, da man dos profesionais máis reputados deste
eido en Galicia”. Profesionais como Carlos Seijo (Maxina) e Toño
Cabanelas (Liveforevr).
Seijo
e Cabanelas, máis polo miúdo, detallarán as posibilidades
creativas dos efectos dixitais, da Realidade Virtual e Mixta ou da
Intelixencia Artifical, aos que se van sumar Jorge Boquete (para
ofrecer un obradoiro sobre a emisión semiprofesional de contidos
audiovisuais por streaming), e máis Ana
Domínguez (S8) Ángel Sánchez (Play Doc), que afondarán na
adaptación dos festivais audiovisuais á distancia social.
Respecto
da decisión de adaptar á contorna online a totalidade do
programa de actividades, o alcalde de Carballo, Evencio Ferrero,
manifestou que “a propia realidade obrigounos a trasladarnos a esta
época de pandemia e a cumprir con todas as normativas sanitarias en
cada momento”. Pola súa banda, a directora do certame, Sonia
Méndez, lembrou que “a cultura é segura” e que “dende a
organización do festival non temos dúbida ningunha ao respecto,
pero a evolución da crise sanitaria e as restricións de movemento
ditadas polos distintos gobernos autonómicos ao longo dos últimos
días para afrontar esta segunda onda da COVID obríganos a repensar
a conveniencia de manter as actividades presenciais nestas
condicións”.
Sonia
Méndez recorda tamén que “o Carballo Interplay é un certame de
contidos dixitais” e que “vimos da Internet e este ano imos ter
que volver á Rede, para coidar, para coidarnos e para demostrar que
a esencia do festival non reside en nada máis que en compartir
creatividade e amor dixital, ben sexa en persoa ou a través das
plataformas”.
Todas
as actividades do festival poderán verse de xeito libre e gratuíto
a través de varias plataformas (Youtube, Facebook e Twitch), o
programa está
dispoñíbel na web do Interplay.
Transportando
realidades ao mundo dixital
Os
especialistas Carlos Seijo (Maxina) e Toño Cabanelas (Liveforevr)
explicarán como en tempos de distancia social, “nos que as
interaccións están máis que nunca mediadas pola pantalla”, as
tecnoloxías emerxen para crear novos mundos pero tamén para
achegarnos doutro xeito aos mundos que xa coñecemos, nunha
actividade que conta coa colaboración da Asociación Galega de
Proferionais da Dirección e da Realización (CREA).
Desde
a transformación de San Juan de Gaztelugatxe en Rocadragón ata a
resurrección de Salvador Dalí ou a asistencia virtual a eventos,
Carlos Seijo falará no Carballo Interplay de tecnoloxías emerxentes
como o deepfake ou a Realidade Virtual e Mixta, ao tempo que
nos presentará varios dos proxectos que creou á fronte do estudio
Maxina.
Toño
Cabanelas, pola súa banda, presentará a publicación inmersiva e
distópica Liveforevr, que recolle patrimonio cultural en XR
(Realidade Estendida) da man dun grupo de creadores e curadores de
contidos 3D sobre música, fotografía, cinema, videoxogos e arte.
Amais,
a directora do Carballo Interplay, Sonia Méndez, falará con Ana
Domínguez (directora do S8) e Ángel Sánchez (director do Play Doc)
sobre as fórmulas aplicadas polos festivais audiovisuais galegos no
contexto da pandemia, como a colaboración con plataformas de
streaming, a creación de contidos específicos para a Rede ou
o deseño de actividades para a súa produción e retransmisión
online. Esta conversa, que poderase ver en streaming (coma
o resto das actividades do festival), está organizada en
colaboración coa Coordinadora Galega de Festivais de Cinema
(Proxecta).
FormaCIP
en tempos de Coronavirus
O
Carballo Interplay adaptou o seu programa formativo á situación
actual e na semana do festival ofrecerá un obradoiro sobre Como
emitir en streaming sen morrer no intento, impartido por Jorge
Boquete. O curso, de 12h horas de duración, custa 25€ e poden
asistir un máximo de 12 persoas, que aprenderán as claves para
emitir contidos audiovisuais por streaming de xeito
semiprofesional.