A estudante noiesa Lidia Dosil gaña o primeiro premio de comunicación científica que convoca a web GCiencia
martes, 29 de xullo do 2014
Lidia Dosil Tajes, alumna
da Facultade de Ciencias Sociais e da Comunicación da Universidade
de Vigo (Campus de Pontevedra), resultou
a gañadora do primeiro Premio Universitario La Caixa de Comunicación
Científica, un certame que convoca GCiencia, a web da ciencia
galega. Segundo informan os responsábeis desta canle en liña,
Dosil, natural de Noia, presentou unha reportaxe titulada A
física vai ó balneario, na que trata as aplicacións que
investigadores da Universidade de Vigo realizan a partir de algas,
nunha iniciativa na que colaboran o Departamento de Física Aplicada
e o Hotel Talaso Atlántico de Oia.
O xurado do premio estivo
integrado por representantes de La Caixa, as universidades de
Santiago, A Coruña e Vigo, o decano do Colexio Profesional de
Xornalistas de Galicia, a delegación territorial en Galicia do CSIC
e un representante de Gciencia.
Nas súas votacións
valorouse “o gran nivel dos traballos presentados”, informa
GCiencia. O certame tivo como finalistas a Andrea Espiñeira
(Medicamento xenómico baixo o paraugas de Anxo Carracedo),
Sabela González (A escritura da luz), Carlos Rey (Trastornos
do sono: doenzas máis aló da
consciencia), Sara Pérez Seijo (Innopharma: unha
pegada galega na industria farmacéutica) e Andrea Oca (Saúde
mental: traballar coa parte sa).
O devandito certame
convocado por GCiencia diríxese a animar aos universitarios á
divulgación científica e a coñecer os seus campus, amais de
promover o xornalismo científico.