A edición 2016 de Transfiere márcase como obxectivo contar con máis presenza de firmas demandantes de TIC
martes, 21 de xullo do 2015
O Foro
Transfiere (Foro Transfire en galego), acadará a
súa quinta edición os vindeiros 10 e 11 de febreiro de 2016 en
Málaga. O
comité organizador do encontro reuniuse recentemente en Madrid
para marcar as liñas estratéxicas, que pasarán por unha maior
presenza de empresas demandantes de tecnoloxía e de investigadores
e, tamén, polo fortalecemento do sector financeiro. O país
convidado desta volta será Corea do Sur.
A dita xuntanza do comité
celebrouse na sede do Ministerio de Economía e Competitividade en
Madrid, e na reunión establecéronse os obxectivos para a vindeira
convocatoria, prevista no Palacio de Feiras e Congresos de Málaga
(FYCMA) os días 10 e 11 de febreiro de 2016. Amais de fixárense os
devanditos obxectivos (máis empresas, máis sector financeiro),
informouse que a edición 2015, celebrada os días 11 e 12 do pasado
mes de febreiro, “foi a máis internacional até a data”, coa
presenza de 26 países de todo o mundo e Israel como nación
convidada.
O evento, que en palabras
dos organizadores “estase a consolidar como a principal cita
estatal sobre I+D+i”, vén avalada polos datos da edición
anterior, no que se deron cita máis de 2.300 profesionais do sector
e houbo 5.000 reunións de traballo en apenas día e medio. A idea do
comité é que o foro tome como base a necesidade de fomentar o
diálogo entre o tecido investigador e a empresa “para potenciar a
innovación española no ámbito global”. Deste xeito,
incorporarase unha axenda de citas en liña para a celebración de
reunións ao redor dos principais sectores produtivos, tales como o
das TIC, a sanidade, o medio ambiente, a infraestrutura e o
transporte, a industria, a enerxía, e os sectores agroalimentario,
aeronáutico e aeroespacial, e “sen esquecer as administracións
públicas”.
Lembrar que no foro
reúnense cada ano axentes públicos e privados vinculados ao
ecosistema do I+D+i, así como profesionais independentes e
representantes de PEME e multinacionais, administracións públicas,
universidades, centros tecnolóxicos e parques científicos e
tecnolóxicos entre outros.
En febreiro de 2015 foron
máis de 450 as entidades públicas e privadas participantes no foro,
“aglutinándose 2.050 perfís tecnolóxicos, medio centenar de
universidades, 220 grupos de investigación e máis de 130 expertos
internacionais no seu programa de conferencias e mesas redondas”.
Presenza galega
Seguindo o fío da
edición anterior do evento de Málaga, cómpre lembrar tamén a
importante presenza nela de institucións, entidades e empresas da
nosa terra, tal e como subliñamos no seu día dende Código Cero.
Así, contouse entre os seus impulsores directos co Centro de
Supercomputación de Galicia (CESGA) e entre as entidades que
participaron (amosando a través de xeiras de networking as
súas investigacións) coas tres universidades galegas (USC, UDC e
UVigo) e máis co Instituto Tecnolóxico de Galicia. Engadir tamén para a edición 2016,
recuncando, a concorrencia activa de EnergyLab
(UVigo), o centro tecnolóxico CITIC (UDC) e a Axencia Galega de
Innovación (GAIN), En total, procedentes de todos os recantos do
Estado, participaron un total de 45 plataformas tecnolóxicas.