A dixitalización será un dos eixes básicos da terceira edición de Mindtech
venres, 17 de febreiro do 2023
Vigo
acolle este venres 17 de febreiro a presentación do encontro Mintech
2023 (Metal Industry and Technologies International Trade
Fair), que se celebra este verán (do 20 ao 23 de xuño). Será a
terceira edición dun encontro organizado pola Asociación de
Industriais Metalúrxicos de Galicia (ASIME) que na súa anterior
convocatoria foi quen de atraer máis 20.000 visitantes e máis de
dous centenares de expositores, amais de preto de medio cento de
novas firmas innovadoras e centros de aceleración. Na presentación
participou o conselleiro de Economía, Francisco Conde, quen
salientou que Mindtech é “o espazo idóneo para xerar sinerxías
entre empresas tractoras e startups da industria”.
Durante
a súa intervención, Conde reivindicou o alicerce industrial que
“Galicia leva no seu ADN”, e salientou “a importancia da
colaboración público-privada como panca do tecido económico”.
O
vicepresidente primeiro e conselleiro de Economía, Industria e
Innovación destacou que o sector do metal representa o 20% do PIB de
Galicia e que no 2022 supuxo o 35,4% do total das exportacións
galegas. Francisco Conde subliñou que esta industria “abrangue un
amplo número de actividades cun grao de interrelación e
competitividade que o converten nun dos sectores con máis potencial
para a innovación e para a diversificación de mercados e produtos”.
Conde
dixo que na terceira edición de Mindtech van estar moi presentes os
retos da innovación, a dixitalización, a transición enerxética e
a sustentabilidade, resaltando que neste encontro “vai quedar de
manifesto o esforzo e a capacidade coa que a industria galega, co
apoio das administracións, lles está dando resposta”.