A diversidade sexual das comunidades, polo miúdo nunha web impulsada dende o Campus de Ourense
martes, 12 de xaneiro do 2016
Un grupo da
Universidade de Vigo dirixido pola socióloga galega Águeda Gómez
vén
de pór en marcha unha web dirixida a amosar os moi diversos xeitos
que temos as persoas de relacionarnos. A páxina, “unha viaxe
transcultural polo xénero e a sexualidade en diferentes
comunidades”, encamíñase nas palabras das súas impulsoras a
visualizar “outras formas de sociedade, con outras clasificacións
de xénero e de sexualidades”. Segundo informa a Uvigo, o sitio en
cuestión é moi acaido para investigadores e docentes e leva por
título Etnicsexualidade.
Investigación en grupos étnicos e sexualidade.
O
acubillo en liña recompila os froitos do traballo realizado
ao longo de máis dunha década pola docente da Facultade de Ciencias
da Educación (Campus de Ourense) Águeda Gómez con especialistas
como a antropóloga mexicana Marinella Miano; a socióloga Silvia
Pérez; o docente de Comunicación Audiovisual Xaime Fandiño, a
docente de Economía Aplicada Rosa María Verdugo e o enxeñeiro
agrónomo Alejandro Nuricumbo.
O resultado de todo
isto permite ver como “o sistema sexo/xénero dunha sociedade non
obedece a unha orde natural dada, senón que é un produto
sociocultural e, polo iso, temporal e cambiante”, sinala a
responsábel da páxina, que engade que estamos, ante todo, “perante
deseños culturais de carácter arbitrario que responden a relacións
históricas e sociais, de poder e de control social”.
Detrás da web,
dándolle forma e apoio, atópase a unidade didáctica Xénero e
sexualidade no mundo: unha viaxe transcultural, realizada grazas
ao accésit concedido no primeiro Premio de creación de materiais
e recursos docentes con perspectiva de xénero Antonia Ferrín
Moreiras, convocado pola Unidade de Igualdade da Universidade de
Vigo no ano 2015. Como contexto a esta unidade didáctica, podemos
dar conta na páxina de traballos sobre a prostitución en España; a
educación para a igualdade desde a antropoloxía sexual; as culturas
sexuais indíxenas en México; a existencia de sociedades
matriarcais; a relación entre e etnicidade e identidades analóxicas,
e a muller e a mobilización étnica. Segundo informa a Universidade
de Vigo en relación a estes traballos achégase un amplo abano de
información, vídeos e imaxes orixinais sobre as culturas obxecto de
interese, presentacións, ligazóns a recursos de interese, etc.