A cobertura galega de banda larga de 100 Mbps é do 59,15%
venres, 4 de maio do 2018
Galicia
tiña en 2017 unha cobertura de banda larga (100 Mbps) do 59,15%,
fronte ao 57,97 de porcentaxe acadado en 2016 e fronte á media
estatal do 76.09% do territorio abranguido. Estas cifras, moi
mellorábeis, veñen de ser achegadas polo Ministerio de Industria,
Turismo e Axenda Dixital (no
seu informe Cobertura de Banda Larga en España,
correspondente a 2017) e confirman que a nosa terra segue na cola
da clasificación en materia de dispoñibilidade de redes no seu
territorio, só por diante de Estremadura e Castela A Mancha.
A
nivel estatal, o informe reflicte un aumento de seis puntos
porcentuais na cobertura de banda larga de 100 Mbps respecto da mesma
data do ano anterior, que alcanza (como dixemos) xa ao 76% dos
españois.
O
informe sinala tamén que a cobertura de 4G alcanzou ao 97,2% da
poboación, mentres que se ampliou o acceso a 3,5G até acadar unha
porcentaxe do 99,9%. No lado positivo, houbo crecementos de máis de
10 puntos na dispoñibilidade de redes de 100 Mbps nas Comunidades
Autónomas de Andalucía, Castela-A Mancha, Aragón e Estremadura.
Tamén se confirma o bo estado de saúde da rede de fibra óptica até
o fogar (FTTH), que se sitúa “como a máis extensa de Europa”
con máis de 35 millóns de accesos. O informe reflicte que o
devandito despregue foi realizado sobre todo grazas ao esforzo
investidor dos operadores privados, que optaron por despregar as súas
propias redes de nova xeración.