A cidadanía poderá enriquecer a aplicación interactiva Lugo na memoria
mércores, 31 de xullo do 2019
O
Concello de Lugo quere ampliar a dinámica da participación cidadá
á creación dos recursos tecnolóxicos municipais. Isto será
extensíbel ao enriquecemento da aplicación interactiva destinada a
poñer en valor o patrimonio da cidade, da
que falamos os días pasados para salientar que se trata dunha
completa ferramenta, con máis de 1.400 elementos de información,
que permitirá aos usuarios percorrer a trama urbanística da cidade
e a súa evolución desde a época medieval á moderna. E todo isto
través do extenso fondo documental fotográfico municipal. Pois
ben, agora o Concello vén de anunciar que aplicación abrirase á
colaboración da cidadanía.
Deuno
a coñecer a alcaldesa de Lugo, Lara Méndez, durante a entrega dos
diplomas e certificados aos alumnos-traballadores do obradoiro de
emprego InteracTICvate que se impartiu no CEI Nodus co fin de
impulsar a cualificación profesional e a inserción laboral dos seus
participantes, e do que abrollou, precisamente, a aplicación Lugo
na memoria, destinada a mostrar de xeito atractivo e dinámico “a
enorme riqueza patrimonial e cultural do concello”, en palabras da
alcaldesa, que tamén deu a coñecer que a ferramenta estará
dispoñíbel na web do Concello a partir deste mesmo venres 2 de
agosto. Tamén dixo que na mesma plataforma o Goberno local
habilitará unha ligazón para que todo aquel que queira aportar
material gráfico ou información para o enriquecemento desta
aplicación e dar a coñecer o patrimonio de Lugo dende diferentes
enfoques.
Lara
Méndez, estivo acompañada polo concelleiro de Desenvolvemento Local
e Emprego, Mauricio Repetto, e aproveitou para agradecer á Xunta de
Galicia as axudas para que este obradoiro se puidera realizar: “As
políticas de emprego non son competencia do Concello de Lugo pero si
é un tema que nos preocupa”, insistiu.
Rematou
anunciando que Desenvolvemento Local ten concedido xa un novo
obradoiro para dixitalización, destinado a axudar á empregabilidade
de menores de 25 anos, e que está a espera de que se confirme outro
para maiores de 25 nos vindeiros días.
Lugo
na memoria
A
aplicación Lugo na memoria abrangue tres itinerarios: o do
trazado do Camiño Primitivo (desde a Porta de San Pedro á Porta de
Santiago); outro que parte de Obispo Aguirre e sae por San Fernando,
e o terceiro que recolle a ampliación urbanística do século XIX
(Progreso, Estación).
A aplicación, artellada cun formato de
fotografías panorámicas e en 3D e que mesturan imaxes reais e
históricas, inclúe un mapa que permite ao usuario unha maior
interacción para que poida desprazarse ao punto que desexe,
realizando paradas en puntos de información onde se explican 360
espazos e edificios emblemáticos elixidos na cidade.