A cámara pontevedresa impulsa a transformación dixital cun ciclo de xornadas hubNET
venres, 10 de novembro do 2023
A
Cámara de Comercio Pontevedra,
Vigo e Vilagarcía de Arousa envórcase coa transformación
dixital das pemes e o emprendemento a través da iniciativa dixital
hubNET,
no marco da que se organiza un amplo ciclo de xornadas baixo o título
Constrúe o teu futuro na era dixital. O programa inclúe un
total de 9 eventos, entre conferencias, seminarios e xornadas
técnicas, que se celebrarán en Vilagarcía de Arousa e Pontevedra e
que están dirixidos a sectores estratéxicos en Galicia: forestal,
transporte e loxística, turismo e comercio comerciante polo miúdo.
O
ciclo arrinca o mércores 15 de novembro, cando terá lugar en
Pontevedra un seminario especializado dirixido ao sector da
loxística, no que se tratará A loxística de última milla como
unha oportunidade no emprendemento. Correrá a cargo de José
Carlos García, secretario xeral da Federación Galega de Transporte
de Mercadorías (FEGATRAMER), e celebrarase ás 18.00 horas na sede
de Afundación de Abanca, no 2 da rúa Augusto González Besada.
O
xoves 16 de novembro, tamén en Pontevedra, celebrarase unha xornada
técnica impartida por Julián Sobrino, xefe de equipo de Bahía
Software, e dirixida ao sector forestal: Solucións tecnolóxicas
para a mellora do sector forestal. Será ás 12 horas na Escola
de Enxeñaría Forestal (A Xunqueira, s/n – Pontevedra).
O
ciclo prosegue o seu calendario o martes 21 de novembro, con dobre
programación en Pontevedra e Vilagarcía de Arousa. Ás 12 horas, a
sede de Afundación de Abanca en Pontevedra acolle a conferencia A
irrupción da Intelixencia Artificial nas empresas,
a cargo de Álvaro Gómez, decano e profesor da Facultade de
Administración e Dirección de Empresas da Universidade
Intercontinental da Empresa (UIE). Pola tarde, ás 18.00 horas, terá
lugar na sede da Cámara en Vilagarcía unha nova xornada técnica,
dirixida nesta ocasión ao sector do turismo, co título Solucións
tecnolóxicas para a mellora da xestión do turismo, que imparte
Santiago Paz, xerente de Dos Espacios.
O
xoves 23 de novembro este ciclo poñerá novamente o foco no turismo,
coa conferencia sectorial A transformación dixital do turismo,
a cargo de Santiago Paz, xerente de Dos Espacios. Celebrarase en
Pontevedra, na sede de Afundación (Abanca) ás 12.00 horas.
O
programa de xornadas complétase na última semana de novembro, con
tres eventos centrados no sector do comercio. O martes 28 de
novembro, ás 12.00 horas, celébrase na sede da Cámara de Comercio
en Vilagarcía a xornada técnica Solucións tecnolóxicas para a
mellora da xestión do comercio, que impartirá Santiago García,
director de Stin.
O
mércores 29 de novembro, tamén na sede cameral en Vilagarcía de
Arousa, terá lugar a conferencia Como aplicar a intelixencia do
dato para a xestión das pemes, a cargo de Manuel Balseiro,
director da área TIC do Grupo Alvariño.
Pola
tarde, ás 18.00 horas, o ciclo péchase na sede de Afundación en
Pontevedra cunha nova conferencia sectorial dirixida ao comercio, O
comercio de proximidade, cara á transformación dixital, que
imparte Moisés Mateo, responsábel de operacións de Galvintec.
O
ciclo finaliza o xoves 30 de novembro, co seminario Como impulsar
o teu comercio na era do e-commerce, impartido novamente por
Moisés Mateo, de Galvintec Será ás 12.00 horas na sede da Cámara
de Comercio en Vilagarcía (Avda. Doutor Tourón, 46 – Vilagarcía
de Arousa).
Respecto
da iniciativa dixital hubNET, esta implica a posta en marcha dous
centros conectados en Pontevedra e Vilagarcía enfocados á
transformación dixital das pemes e ao emprendemento en sectores
estratéxicos do tecido económico galego: industrias forestais,
transporte e loxística; turismo e comercio comerciante polo miúdo.
O
proxecto dixital hubNET está co-financiado polo Fondo Europeo de
Desenvolvemento Rexional (FEDER) a través da Fundación INCYDE,
dentro do Programa Operativo Plurirrexional de España 2014-2020
dentro do eixo 3, que ten como obxectivo mellorar a competitividade
das pemes e o fomento do espírito empresarial promovendo a
explotación económica de novas ideas e promovendo a creación de
novas empresas.
O
gran obxectivo de dixital hubNET será “contribuír e apoiar a
modernización e sustentabilidade do tecido produtivo da demarcación,
a través do investimento en I+D+i na actividade habitual das
empresas, nunha contorna de colaboración e de xeración de sinerxías
entre entidades, startups e firmas tractoras”.