A asemblea xeral do Cluster TIC celébrase de portas abertas e a continuación da Lacon Network
mércores, 23 de maio do 2012
A Asemblea Xeral Ordinaria do Cluster TIC
Galicia, que se desenvolverá este venres, día 25, en Santiago a partir das 17
horas, será
de portas abertas e estará precedida pola Lacon
Network, encontro gastronómico-tecnolóxico dos nosos profesionais TIC, que
contará nesta nova edición coa presenza de Juan Santesmases,
conselleiro delegado de Zitralia. O
Cluster, como recordaremos, asume a organización da 28 edición desta xuntanza
empresarial, sendo o operador R o patrocinador do evento.
Como dixemos, no encontro (que vai pola súa 28
edición) participará o conselleiro delegado de Zitralia, que amosará as claves
do éxito deste e outros proxectos, amais do seu punto de vista sobre o futuro
do sector TIC. Lembrar que Zitralia é unha empresa centrada no desenvolvemento
de sistemas de seguridade avanzada. Polo seu potencial innovador foi incluída
no Top 100 da revista Red Herring.
Tralo relatorio darase paso á comida de
ambiente distendido e de traballo en rede propia de todas as edicións desta
xuntanza.
Ás 17.00 horas, en primeira convocatoria, e ás
17:30, en segunda, os socios do Cluster están chamados á Asemblea Xeral
Ordinaria, que será de portas abertas, polo que é previsible a asistencia de
emprendedores e empresarios non integrados na entidade pero que teñan
participado na Lacon Network e queiran quedarse a coñecer de primeira man o
labor do Cluster TIC Galicia. Tanto a conferencia e a comida da Lacon Network
como a Asemblea Xeral do Cluster terán lugar no Hotel Los Abetos, no
barrio compostelán de San Lázaro.