A app de Viaqua enfía o seu primeiro aniversario evitando desprazamentos e facilitando trámites
luns, 24 de abril do 2017
Para quen non o saiba, a compañía Viaqua ten
dende hai case un ano a disposición da cidadanía unha aplicación
de balde (App da Oficina Virtual) para que os usuarios poidan facer
todas as súas xestións e sen desprazamentos. A ferramenta móbil,
habilitada para sistemas Android
e iOS,
é literalmente unha oficina virtual con todos os elementos precisos
para levar a cabo un trámite ou operación dende calquera lugar e en
calquera intre do día. En palabras de Viaqua, esta aplicación de
software para dispositivos móbiles ou tabletas posibilita “un
espazo práctico e áxil dende o que os aboados do servizo poderán
levar a cabo as operacións habituais do seu contrato”. Por certo
que este mes de abril a app foi obxecto dunha serie de
melloras e actualizacións, engadíndose novas funcionalidades para o
rexistro en liña e máis a xestión de altas, baixas e cambios de
titular dos subministros de auga. Arestora está dispoñíbel a
versión 1.6.2 da aplicación.
Nun plano máis concreto, grazas a este recurso os
usuarios poden facer cousas como o pago das facturas, a consulta ao
detalle de todas a facturas emitidas ou coñecer se hai pagos
pendentes. Tamén é posíbel facer seguimentos da evolución do
consumo particular durante os últimos meses (a través de gráficas)
así como o seu importe relacionado. Asemade, fornece aos clientes da
posibilidade de modificar os datos de pago e de correspondencia do
contrato. Esta aplicación gratuíta tamén permite darse de alta no
servizo da factura sen papel, en palabras de Viaqua, “un sistema
ecolóxico e seguro para recibir todas as facturas e consultalas en
liña cando se precise”.