A aplicación Badi App facilita ao máximo a busca de compañeiros de piso
xoves, 17 de setembro do 2015
A Rede, dun tempo a esta
parte, funciona para moita xente como un medio para facilitar e
acurtar procesos tradicionais da vida diaria. Como por exemplo buscar
habitación. Nesta liña de botarnos unha man en actividades
relacionadas coa vivenda (actividades que adoitan adiarse no tempo
máis da conta) sitúase a
aplicación Badi App, unha ferramenta de balde que se presenta
como o remate e a solución da nosa peregrinaxe polos taboleiros de
anuncios de facultades ou as inmobiliarias, na procura do noso
vindeiro domicilio. Trátase dun recurso para dispositivos
intelixentes que permite, en palabras dos seus creadores, “buscar
compañeira/o de piso ou unha habitación de aluguer mediante un chat
instantáneo, ao estilo Tinder”. Ademais, emprega un xeolocalizador
que posibilita atopar aloxamento segundo a proximidade.
A aplicación, polo
tanto, xunta nun único acubillo as ofertas máis próximas coa
vantaxe engadida de coñecer a compatibilidade de gustos e
necesidades entre arrendatarios e quen alugan. “E sen
intermediarios”, explican os responsábeis do seu desenvolvemento,
que engaden que o requisito principal para tirarmos partido da
ferramenta é rexistrarnos e cumprimentar todos os eidos do perfil,
co fin encetar a procura dunha habitación e dos vindeiros
compañeiros de vivenda. “A aplicación”, engaden, “tamén
evita as estafas en liña, que están no seu máximo apoxeo, e
liquida un dos principais medos que ten o usuario á hora de alugar
unha habitación: o descoñecemento da persoa coa que vai convivir”.
Isto acádase tirando proveito dos recursos de procura de afinidade
que se poñen en xogo: permítese a propietarios e inquilinos
explorar intereses, afeccións e perfís dos candidatos a ser
compañeiros de fogar para comprobar, previamente, se pode haber
compatibilidade.
A iniciativa Badi App foi
posta en marcha en maio de 2015 da man do emprendedor Carlos Pierre,
grazas a un investimento persoal co que desenvolveu o deseño e a
aplicación. Case un mes máis tarde, o promotor conseguiu captar
30.000 euros de investidores privados. O 40% adicouno a investimento
en tecnoloxía e o 60% a mercadotecnia.