A agricultura ecolóxica galega crea un servizo online para achegar produtos ao consumidor
mércores, 22 de abril do 2020
O
Consello Regulador da Agricultura Ecolóxica de Galicia (CRAEGA) está
a dar pasos relevantes para mitigar os graves efectos que está a
xerar o Estado de Alarma entre os produtores, tendendo pontes firmes,
malia as restricións, entre os nosos alimentos eco e os
consumidores. Por esta razón, vén de poñer en marcha unha guía de
venda online de produto certificado. A
través da páxina web do consello, os cidadáns teñen á súa
disposición un amplo directorio con máis dunha vintena de
operadores que lles levan a compra á casa.
O
CRAEGA lembra que a actividade do sector e a distribución está
garantida polo Real Decreto 463/2020, porén, “coas canles de
distribución convencionais pechadas (hostalería e mercados
tradicionais), moitos produtores ecolóxicos atravesan serias
dificultades para dar saída á súa colleita”. Desta vontade de
sortear os obstáculos é de onde xorde a dita iniciativa dixital,
“unha plataforma web para poñer en contacto aos nosos operadores
co consumidor final”, explica o presidente do Consello, Francisco
López Valladares, que engade que aínda que nun primeiro intre a
guía estaba dirixida só produtores, paseniño fóronse sumando
empresas transformadoras e comercializadoras que tamén prestan
servizo a domicilio.
Mercaproximidade
Alén
da plataforma de venda online de produto ecolóxico, o CRAEGA
colabora coa Consellería do Medio Rural en Mercaproximidade, unha
iniciativa que nace para achegar a produción de agricultores,
gandeiros e industrias á gran distribución. O proxecto impulsado
tamén durante estado de alarma está a suscitar gran interese entre
os operadores certificados e, polo momento, xa remitiron a súa
solicitude 13 inscritos.