A Zona Franca anuncia a ampliación do Parque Tecnolóxico de Vigo
venres, 27 de xullo do 2012
A delegada da Zona Franca de Vigo, Teresa Pedrosa, vén de presentar perante
o Pleno da entidade a súa nova política de inversións para o vindeiro ano 2013,
que consiste, basicamente, en destinar unha maior cantidade de recursos económicos
e persoais no apoio a emprendedores, e á innovación e internacionalización das
empresas da área de Vigo.
Pedrosa aproveitou a ocasión para presentar os presupostos do Consorcio
para o vindeiro exercicio, e lembroulle ás persoas asistentes que a entidade
que representa “está para promover a
creación de todo tipo de empresas, grandes e pequenas; para axudar ás
existentes a competir con mellores armas e para facilitarlle o camiño a novos
inversores”, apuntou.
O Pleno tamén coñeceu a previsión de liquidación do presuposto de inversións
deste ano 2012, que coas contas revisadas estímase que se executen unhas
inversións en inmobilizado por un importe de 15,5 millóns de euros, co que se
acadaría así o cumprimento do 100% da contía presupostada o ano pasado.
Dentro do escenario empresarial, a actividade prevista para o vindeiro 2013
considera como liñas de actuación principais algunhas como o pulo á actividade
empresarial de Vigo e a súa área de influencia; a mellora do rendemento enerxético
das empresas instaladas en Balaídos; a comercialización do solo e demais dotacións
dispoñibles en Porto do Molle e a finalización das obras e posta en marcha do
novo Centro de Negocios e Iniciativas Empresariais e o Centro Tecnolóxico de
Porto do Molle.
Este último está previsto inauguralo a mediados do vindeiro ano, data na
que ademais se porá en marcha unha Rede de Emprendedores que terán accedo a un
espazo virtual de seu, dende o que poderán acceder á oferta unificada de todas
as axudas poñendo en relación a inversores e provedores de servizos.
No tocante á ampliación do Parque Tecnolóxico e Loxístico de Vigo, cabe
dicir que se vai estender en 25 hectáreas, para o que se investirán máis de 30
millóns de euros.