A Xunta lanza unha aplicación informática para a xestión da biomasa preto das vivendas
martes, 27 de agosto do 2019
O
conselleiro do Medio Rural, José González, reiterou onte a súa
aposta pola ordenación forestal como “a mellor arma para loitar
contra o problema dos incendios nos montes”. Advertiu ademais que
esta é unha tarefa de todos, “con independencia de cores
políticas”, e agradeceu, nese sentido, a implicación dos
concellos galegos nesta materia. Fixo
estas declaracións en San Caetano durante a apertura da xornada
informativa sobre a aplicación informática Xesbío, dirixida a
alcaldes, concelleiros e técnicos municipais dos 97 concellos que xa
contan co plan municipal de prevención e extinción de incendios,
para xestionar os incumprimentos e notificacións vinculados á
xestión de biomasa forestal na contorna das vivendas.
Ao
tempo, o titular de Medio Rural sinalou que grazas a este compromiso
tódalas administracións e os particulares traballan de xeito
coordinado e conxunto a prol da ordenación e da limpeza de predios
de cara a anticiparse ao problema dos lumes, na procura dunha Galicia
verde.
Así,
o conselleiro manifestou que a finalidade da ferramenta informática
Xesbío é dar soporte á Administración local na xestión da
biomasa nas rede de faixas secundarias, situadas preto das vivendas.
Esta aplicación permitirá xestionar e elaborar diferentes tipos de
notificacións que os concellos lle enviarán aos titulares de
parcelas nestas franxas e ofrecerá tamén a posibilidade de xerar un
documento de adhesión dos particulares ao contrato de xestión da
biomasa.
Neste
aspecto, José González explicou que un dos maiores problemas cos
que se atopaban os gobernos locais era o de identificar estes terreos
e, a continuación, ao seu propietario. Grazas a esta ferramenta,
creada ex profeso para este fin pola Consellería do Medio Rural en
colaboración coa Axencia para a Modernización Tecnolóxica de
Galicia (AMTEGA), facilitaráselles moito aos gobernos locais a
execución das súas competencias neste ámbito. Desta forma, e
segundo indicou González, todo o relacionado coa tramitación
administrativa queda solucionado con esta aplicación, pois permitirá
xerar un modelo de dilixencia de comunicación previa, outro de
dilixencia de notificación e un terceiro de anuncio de comunicación
a responsábeis descoñecidos.
Ademais,
o conselleiro adiantou que a día de hoxe están adheridos ao
convenio de protección das aldeas 222 concellos galegos e ademais xa
hai máis de 16 que se mostraron interesados en crear unha aldea
modelo no seu municipio, o que permitirá optimizar a xestión da
biomasa preto das vivendas.
A
iniciativa das aldeas modelo nace co obxectivo de executar a limpeza
das franxas secundarias e poñelas a producir. Unha vez despexadas
esas franxas porase en valor ese terreo creando actividade
agrogandeira nelas, mediante cultivos de horta, cereal, pastos,
froiteiras, castiñeiros, oliveiras, etcétera. Todo isto funcionará
como devasa natural fronte o lume xa que, desenvolvendo actividade
económica nas franxas non será preciso rozar tódolos anos.