A Xunta impulsa máis de 40 actividades para celebrar o Mes da Ciencia en Galego nas Bibliotecas
mércores, 2 de novembro do 2022
O secretario xeral de Política Lingüística, Valentín García,
e o director xeral de Cultura, Anxo M. Lorenzo, participaron
esta mañá na convocatoria de prensa de presentación da programación de
actividades do Mes da Ciencia en Galego nas Bibliotecas na rede pública da
Consellería de Cultura, Educación, FP e Universidades, así como nas bibliotecas
escolares. No acto, que tivo lugar na Biblioteca Pública de Santiago Ánxel
Casal, tamén participaron a subdirectora xeral de Bibliotecas e do Libro,
Cristina Rubal, e José Tubío, profesor e investigador da Universidade de
Santiago de Compostela, e autor do manifesto deste ano titulado O deber de
coñecer e transmitir a nosa historia científica.
Valentín García sinalou que “o mes de novembro é o momento
en que chamamos a atención sobre os recursos con que contamos para divulgar
ciencia en galego e achegar á cativada á ciencia nesta lingua, pero o uso
destes materiais e a creación de actividades de temática científica no noso
idioma pode e debe continuar todo o ano, nos centros educativos e nas casas”.
Pola súa parte, Anxo Lorenzo coincidiu na importancia desta
iniciativa que axuda a “dar a coñecer e prestixiar a ciencia e as tecnoloxías”
a través das actividades da rede de bibliotecas que, nas súas palabras, “son
espazos de referencia para todos os públicos, sobre todo para o infantil e
xuvenil”.
Laboratorios científicos durante un mes
Entre hoxe e o 30 de novembro, a Biblioteca de Galicia, así
como as bibliotecas públicas Miguel Ángel Garcés da Coruña; de Lugo; Nós, de
Ourense; Antonio Odriozola, de Pontevedra; Ánxel Casal, de Santiago, e Juan
Compañel, de Vigo, acollerán ata 44 actividades de divulgación científica como
obradoiros de robótica, sobre científicas galegas ou mesmo de experimentos;
contacontos, charlas e mostras bibliográficas. A programación completa pode consultarse vía web.
Ao mesmo tempo, as bibliotecas escolares tamén se unen a
esta celebración promovendo o desenvolvemento diversas iniciativas relacionadas
coa ciencia. Nesta liña, o Portal Educativo mantén un espazo cunha selección de
materiais sobre ciencia en galego, así como maletas viaxeiras que poden
utilizar os centros de xeito temporal con temáticas arredor dos diferentes
eidos científicos.
Desde a Consellería mantense, ademais, unha selección de
libros de divulgación científica en galego como apoio ao alumnado nos seus
traballos de investigación. A isto súmaselle o proxecto Biblioteca Creativa,
enmarcado no Plan Lía (Lectura, Información, Aprendizaxe), a prol da
introdución dun espazo de creación e experimentación na biblioteca escolar.
Os Equipos de Dinamización da Lingua Galega (EDLG) tecen
sinerxías cos equipos de biblioteca e cos departamentos co fin de conseguir que
o alumnado descubra, coñeza e divulgue a ciencia en galego. Deste xeito,
ademais de realizar experimentos, xogos, investigacións, conferencias, debates
ou proxectos relacionados coa temática, estes recóllense en vídeos, podcasts,
titoriais, aplicacións, presentacións ou revistas dixitais que se difunden a
través de internet e das redes sociais e que poden
consultarse no Portal da Lingua Galega.