A Xunta concederá axudas para a adquisición de equipos de satélite de TDT
martes, 6 de abril do 2010
A Xunta de
Galicia, a fin de levar o novo sinal de televisión a todas aquelas zonas que
quedarán sen cobertura terrestre unha
vez concluído o proceso de apagamento analóxico, está xa a tramitar axudas para
a adquisición de equipos de recepción por satélite para aquelas localidades
que, por razóns xeográficas ou sociais, precisan instalar equipos de cobertura
dixital para esta plataforma, tal e como xa anunciara en distintas ocasións no
Parlamento de Galicia o secretario xeral de Medios, Alfonso Cabaleiro.
Estas axudas
irán destinadas a persoas de colectivos en risco de exclusión social e serán
tramitadas en colaboración cos concellos, instaladores e as deputacións
provinciais interesadas.
O Plan Técnico
Nacional de TDT, aprobado polo Goberno central, establecía para Galicia unha
cobertura de TDT do 98 por cento. O Goberno galego pola súa parte fixou como
compromiso chegar ao 100 por cento de cobertura. Nestes momentos xa é do 99 por
cento e durante os próximos días, unha vez concluída a transición de sinal
analóxico a dixital, técnicos da Xunta e das empresas instaladoras certificarán
as distintas zonas sen cobertura terrestre, un requisito necesario para a
instalación de equipos de recepción por satélite, tal e como establece unha
disposición adicional da lei 7/2009 sobre modificacións técnicas de impulso á
TDT.
Ás axudas que
se publicarán proximamente no Diario Oficial de Galicia (DOGA) poderán
acollerse todas aquelas persoas que pertenzan a colectivos en risco de
exclusión social, e irán destinadas tanto aos que vaian a instalar equipos satélites
como, con carácter retroactivo, aos que xa o fixeran. Neste sentido o Goberno
galego puxo en marcha varias unidades móbiles que percorren Galicia para poder
tamén identificar a persoas sen cobertura dixital que por distintas razóns non
informaron nin aos concellos, nin a instaladores nin ao 012 ou a Oficina
Técnica da TDT.