A Xunta e Filmin contribuirán á difusión do cinema galego cun catálogo monográfico
martes, 2 de xaneiro do 2024
A plataforma en liña Filmin confírmase neste novo ano como unha das
principais canles de acceso a contidos en galego, non só pola
orixe galega (en 2007) da plataforma, senón tamén polos datos
de presenza destes contidos na nosa lingua achegados pola Mesa
pola Normalización Lingüística no seu Informe Xabarín 2023.
Agora, a Xunta vén de apostar por Filmin para dar un novo paso na
difusión do cinema galego. A través da colaboración con esta
plataforma, porase a disposición
do público un catálogo monográfico no que se agrupan filmes de
autoría galega, xunto con outras películas que poden verse
en galego grazas á dobraxe ou aos subtítulos.
Baixo
a denominación Cinemas_GAL,
reúnense
máis de 80 títulos que xa
formaban parte do repositorio da plataforma, pero que agora poden
atoparse clasificados nunha única carpeta temática subdividida en
categorías como Éxitos
recentes do cine galego, Éxitos internacionais en galego, Autores
galegos, Curtametraxes galegas, Documentais, O mellor cine europeo en
galego,
ou fitas baixo o epígrafe Música.
Esta
canle é unha iniciativa estratéxica coa que a
Consellería de Cultura, Educación, FP e Universidades quere
“destacar a presenza de cinema galego no seu conxunto, facilitando
a identificación e localización das producións galegas, ou que
se poden ver dobradas ou subtituladas ao galego dentro desta
plataforma, referente a nivel estatal na distribución de cinema de
calidade”.
Segundo
os seus datos, en 2023 Filmin volveu bater o seu propio récord en
canto ao crecemento en número de persoas subscritoras, visionados e
títulos en catálogo, así como en películas distribuídas en salas
de cinema antes da súa chegada á plataforma.
Dentro
desta canle atópanse tanto filmes de recente estrea como Matria,
xunto a títulos que fixeron historia dentro do cinema galego polo
seu recoñecemento internacional. Son os casos, por exemplo de O
que arde, O corpo aberto, Lúa vermella ou
9 Fugas,
ao igual que outras películas tamén dispoñíbeis
que abranguen os xéneros de ficción, animación e documental como
Dhogs,
Trinta
lumes,
Costa
da Morte,
María
Casares, a muller que viviu mil vidas,
Valentina,
Trote,
Nación,
A Esmorga, María Solinha, Os días afogados ou Dorothè na vila.