A Xunta dixitalizará máis de 105.000 documentos bibliográficos do patrimonio eclesiástico
luns, 17 de xaneiro do 2022
A
Xunta
de Galicia, a través da Consellería de Educación e Cultura,
anunciou a vindeira dixitalización de máis de 105.000 documentos
bibliográficos do patrimonio eclesiástico para poñelos a
disposición da cidadanía. Este labor, que se vai levar a bo
entre os anos 2022 e 2023, implicará a integración dos documentos
en Galiciana, a biblioteca dixital de Galicia xestionada na Cidade da
Cultura. Investiranse 84.000 euros.
Trátase
dunha actuación que se fará ao abeiro dos fondos de Mecanismo de
Recuperación e Resilencia e que foi acordada na última reunión da
Comisión Mixta Xunta-Igrexa presidida polo conselleiro de Cultura,
Educación e Universidade, Román Rodríguez.
Así,
os 105.123 documentos, entre os que se atopan fichas co inventario
dos bens móbeis ou información sobre partes de maior interese
artístico e histórico como pinturas, arcos ou inscricións,
sumaranse aos xa existentes no repositorio, composto por preto de 2,5
millóns de documentos e máis de 6.800 rexistros bibliográficos dos
fondos máis relevantes.
“A
dixitalización destes documentos”, informou a Consellería,
“permitirá enriquecer o patrimonio bibliográfico dixitalizado da
nosa Comunidade ao tempo que se garante a súa preservación e se
facilita á cidadanía o acceso a información dalgúns dos bens
patrimoniais máis destacados, con documentación detallada sobre o
seu inventario e elementos máis singulares”.
Esta
actuación enmárcase no compromiso da Administración autonómica
coa preservación e rehabilitación do patrimonio cultural, no que
investiu 10,2M€ nas seis dioceses durante o último exercicio.
Entre
as intervencións apoiadas este ano grazas a este investimento
figuran obras de restauración como as realizadas no santuario da
Nosa Señora das Ermidas, no Bolo; na igrexa de San Pedro, en Lugo;
no Colexio do Cardeal de Monforte de Lemos, ou nas catedrais de
Ourense, Santiago, Mondoñedo ou Lugo.