A Xunta apoia o máster en consultoría de software libre da Universidade de Vigo
luns, 26 de xullo do 2010
Nos tempos de crise como os que estamos a
sufrir neste intre, semella que a mellor alternativa para destacar un pouco no
difícil mundo empresarial é investir en novas tecnoloxías da información e a
comunicación, e máis concretamente nas ferramentas abertas, que ademais de aportar
vantaxes económicas e de seguridade, aporta o valor engadido da súa liberdade
de uso e redistribución. Pois ben, cunha achega económica de 30.000 euros, a Xunta
de Galicia, da man da Secretaría Xeral de Modernización e Innovación Tecnolóxica,
vai apoiar o uso das fontes abertas no noso país, colaborando estreitamente no
desenvolvemento do Máster en Consultoría de Software Libre, organizado un ano máis
pola Escola Superior de Enxeñaría Informática da Universidade de Vigo.
Este Máster, que conta con 60 créditos, cadra
cos obxectivos estratéxicos de Galicia no ámbito das TIC e ten como obxectivo a
formación de profesionais cun coñecemento amplo e sólido que os capacite para
dirixir proxectos e levar a cabo tarefas en ámbitos concretos das Tecnoloxías
da Información e da Comunicación aplicando métodos e ferramentas baseados en software
libre e códigos de fontes abertas (FLOSS).
A secretaria xeral de Modernización, Mar
Pereira, e o reitor da Universidade de Vigo, Salustiano Mato, asinaron
recentemente o convenio de colaboración que autoriza esta achega e compartiron
a súa visión sobre este tipo de ferramentas que tanto pulo reciben dende a
universidade olívica.
Dende a propia entidade académica afirman
que os titulados e tituladas que cursen o Máster “adquirirán competencias específicas en desenvolvemento de aplicacións de software
libre, en implantación de ferramentas de intelixencia de negocio, así como en consultoría,
administración e xestión das TIC e seguridade e protección de datos”.
O Máster, que se
divide en 6 módulos, ten diferentes obxectivos formativos, porén destaca sobre
todo por proporcionar un amplo dominio das principais tecnoloxías de
desenvolvemento de sistemas de información baseados en códigos de fontes
abertas.
Asemade, os alumnos e
alumnas asistentes recibirán formación específica sobre as principais técnicas
de planificación, xestión e control de calidade de proxectos informáticos e
sobre o marco normativo e obrigacións
legais relativos á seguridade dos sistemas de información e de protección de
datos son outras das liñas estratéxicas do Master.
Por outra banda, ó
concluir a súa formación, tamén dominarán os aspectos e técnicas das actividades da
consultoría informática así como os principais conceptos de estrutura da
empresa, a función directiva, os procesos
de toma de decisións, e o establecemento da política estratéxica da
empresa é outra das áreas nas que se poderán formar os asistentes ao curso.
Nesta mesma liña de coñecemento
do ámbito empresarial analizaranse e os fluxos e medios polos que os directivos
das empresas reciben e distribúen a información do negocio así como os métodos
e ferramentas que permiten aliñar a política TIC dunha empresa coas súas
necesidades estratéxicas. Ademais,
estudaranse os principais métodos de
auditoría e mellora continua en solucións TIC, co fin de poder realizar
diagnósticos de situación, priorización de propostas tecnolóxicas e xestionar
adecuadamente a infraestrutura TIC da organización.
Outro dos obxectivos do Máster é
que os alumnos adquiran as capacidades directivas necesarias para liderar e
motivar adecuadamente a equipos de traballo multidisciplinares. No apartado da
seguridade a formación centrarase en dar a coñecer os principais tipos de
ameazas aos que está sometido un sistema informático, así como os métodos de
protección, detección e políticas de seguridade.
Plan Operativo 2010
Este convenio
enmárcase no Plan Operativo 2010 en materia de Software Libre e de Fontes
Abertas, dotado con 800.000 euros, e que a Secretaría Xeral de Modernización e
Innovación Tecnolóxica presentou o pasado mes de abril ás asociacións de
usuarios e empresas de software libre galegas. O plan contempla 21 accións que
desenvolverá a propia Administración autonómica e outras 60 en colaboración
coas asociacións de usuarios, empresas de software libre e as tres universidades
para promover o uso do FLOSS na
Administración, na cidadanía e nas empresas galegas.