A Xunta ampliará de maneira automática os prazos dos trámites en liña en caso de incidencia
luns, 23 de decembro do 2019
O
Goberno
galego vén de anunciar a ampliará os prazos dos trámites online
en caso de incidencia técnica na Sede Electrónica que impida o seu
funcionamento ordinario, e farao ademais de maneira automática.
É un dos tres decretos que se prevén aprobar esta lexislatura no
marco da Lei de Administración Dixital de Galicia (LEDIXGA),
aprobada o pasado mes de xullo, e que busca universalizar o acceso
dos galegos ao servizos dixitais.
En
termos máis concretos, o decreto, que entrará en vigor trala súa
publicación no Diario Oficial de Galicia, establece unha ampliación
automática de 24 horas hábiles sobre o prazo previsto, “en caso
de que unha incidencia técnica non programada impida o funcionamento
normal da Sede Electrónica da Xunta na última hora do prazo
estipulado ou durante 3 horas de xeito ininterrompido nas doce horas
previas ao remate dese prazo”. O obxectivo é “incrementar as
garantías e facilidades para cidadáns e empresas no contexto actual
de transformación dixital, no que a xestión online se está
a consolidar entre os galegos como a opción maioritaria para
relacionarse coa Administración”, informa AMTEGA, ilustrando o
devandito co seguinte dato: “Entre xaneiro e setembro de 2019 máis
do 52% das xestións rexistradas pola Administración autonómica
presentáronse online, ben a través da sede electrónica da
Xunta, das oficinas virtuais, ou a través o rexistro electrónico”.
A
eSede permite presentar a distancia máis 1.600 trámites, e esta foi
a canle elixida preto de 500.000 galegos, que entre xaneiro e
setembro empregaron a sede para realizar as súas xestións coa
administración autonómica.
O
decreto que regula a ampliación de prazos é un dos tres que a
Administración autonómica prevé a aprobar esta lexislatura, dentro
dos obxectivos marcados pola LEDIXGA. Segundo engade a axencia
AMTEGA, estase a traballar neste intre na elaboración do decreto que
regulará o Marco galego de Competencias Dixitais e que permitirá á
cidadanía e aos empregados públicos acreditar os coñecementos e
habilidades dixitais, tomando como referencia o marco europeo.
Ademais, atópase en fase de elaboración o decreto que regulará o
rexistro de apoderamentos, e que permitirá habilitar a unha persoa
ou a un funcionario público a realizar trámites dixitais en nome
doutra persoa.