A Universidade de Vigo amplía as posibilidades das TIC mediante o uso de e-portfolios
martes, 12 de xaneiro do 2010
Ao longo dos vindeiros meses de
febreiro e marzo, a Aula Tecnolóxica da Casa das Campás de Pontevedra, vai dar
acollida ao curso de Deseño técnico e
didáctico dun e-portfolio, dirixido á formación do profesorado no eido da
creación e uso destas ferramentas tecnolóxicas.
Esta actividade formativa,
programada pola Vicerreitoría de Formación e Innovación Educativa da
Universidade de Vigo, busca que tanto o alumnado como o profesorado empreguen
as TIC de xeito efectivo no seu traballo diario e, en concreto, capacita aos
docentes para integrar o uso dun e-portfolio
no proceso de ensino e aprendizaxe.
A Universidade de Vigo oferta para
este curso un total de 20 prazas, que se cubrirán por orde de inscrición ata o vindeiro
31 de xaneiro.
O e-porfolio é unha ferramenta
formativa e de avaliación que ten como novidade máis característica, segundo os
organizadores do curso, “o establecemento
dun proceso de reflexión sobre a aprendizaxe conseguida”. A través desta
actividade formativa o profesorado adquirirá as competencias técnicas e
metodolóxicas precisas para a creación e uso de e-portfolios, o que lle permitirá complementar e completar as aulas
co apoio de materiais virtuais. Para isto, ao longo do curso analizaranse de
forma práctica as diferentes ferramentas que están a disposición dos docentes
nunha plataforma de aprendizaxe virtual e que son de interese para a
construción dun e-portfolio.
Asemade, trataranse os elementos
básicos que o compoñen e analizarase como establecer actividades, métodos de
avaliación e procesos de reflexión sobre o ensino e a aprendizaxe nunha
contorna virtual. Estas aplicacións concretas englóbanse nun obxectivo común,
que é, segundo informan dende a organización, o de “favorecer o desenvolvemento dos novos roles docentes e investigadores
dentro do EEES mediante Contornas Virtuais de Aprendizaxe e fomentar a
sensibilidade cara aos valores propios da docencia favorecendo as actitudes
cara á innovación”.
Impartirá o curso o profesor da Facultade de Ciencias Sociais e da
Comunicaicón, José Vicente Novegil Souto, quen, para o desenvolvemento dos
contidos, empregará unha ferramenta virtual dispoñible no portal FaiTIC, que fomenta a interacción
entre o alumnado e os profesores, e que serve principalmente para intercambiar
recursos educativos e opinións.
Matrícula en liña e obtención do certificado
O prazo de inscrición manterase aberto
ata o vindeiro 31 de xaneiro e pode formalizarse en liña a través da plataforma
Bubela
da Área de Posgrao Virtual. Para solicitar máis información pódese escribir ao
enderezo de correo electrónico
formacion.profesorado@uvigo.es
ou chamar ao teléfono 986813596. A
asistencia a esta actividade formativa será certificada pola Universidade de
Vigo a todas aquelas persoas inscritas que asistan, polo menos, a dez sesións
completas das doce que ten o curso, e cubran uns contidos mínimos do 80% das actividades
marcadas polo responsable do actividade.