A UVigo xunta forzas coa Asociación de Robótica e Automatización
venres, 7 de febreiro do 2020
A
Universidade
de Vigo e Asociación Española de Robótica e Automatización veñen
de xuntar forzas para impulsar a Industria 4.0. A alianza
formalizouse este martes co acordo de colaboración asinado entre a
Universidade de Vigo e a Asociación Española de Robótica e
Automatización, rubricado polo reitor, Manuel Reigosa, e o
vicepresidente da entidade, Salvador Giró.
Un
día máis tarde, ao abeiro desta cooperación, celebrouse na Escola
de Enxeñaría Industrial unha xornada técnica sobre os recursos
innovadores que impulsan a automatización e a intelixencia nos
ámbitos empresariais, e na que participaron empresas como ABB, Kuka,
Omron, Universal Robots ou Schunk.
Segundo
nos fixo saber o profesor do Departamento de Enxeñaría de Sistemas
e Automática Ignacio Armesto, este acordo xurde da colaboración de
AER coas Xornadas de Automatización Industrial (as JAI), que el
mesmo coordina: “O que buscamos dende a UVigo con este convenio é
mellorar a formación do noso alumnado e profesorado a través de
conferencias, cursos, xornadas, material didáctico, etc. no eido da
robótica e a automatización industrial”. Neste punto, prosegue,
“estreitar a colaboración con AER é clave, xa que a asociación
une a todos os actores do sector para fomentar a dixitalización das
nosas empresas, ao máis alto nivel, co obxectivo de converter España
nun dos países punteiros no contexto industrial”.
No
acto de apertura das xornadas, mas que participaron máis de 120
persoas, estiveron presentes a vicerreitora de Transferencia,
Consuelo Pérez, o director da Escola de Enxeñería Industrial, Juan
Pardo e a concelleira de I+D e docente nesta escola, Ana Mejías. A
vicerreitora agradeceu ao profesor José Ignacio Armesto “o seu
esforzo e entusiasmo” por facer posíbel este convenio, que segundo
Juan Pardo “reforza un compromiso que ten a EEI dende que apostou
polas titulacións que configuran a súa oferta académica”.
Ana
Mejías, pola súa banda, lembrou o premio nacional Ciudad de la
Ciencia y la Innovación co que foi distinguido Vigo hai uns meses e
explicou que é “froito dun ecosistema real formado polo tecido
industrial, a Universidade e os centros tecnolóxicos”.
Salvador
Giró, pola súa parte, fixo un retrato do futuro que nos agarda: “En
2025 as máquinas intelixentes asumirán o 52% das tarefas
industriais, comportando a perda de 75 millóns de empregos no mundo,
pero xerando no seu lugar, 133 millóns de novos empregos que
precisarán de persoal formado e especializado nestas novas
tecnoloxías”. Neste contexto, dixo, “é crucial que a
Universidade forme ás novas xeracións para estes traballos de
futuro”, un dos obxectivos deste convenio asinado coa AER.