A UVigo constata a efectividade de Fire-RS para predicir o comportamento dos lumes
mércores, 8 de maio do 2019
A
Universidade
de Vigo presentou o balance de fitos e achados do proxecto Fire-RS,
unha iniciativa para loitar contra os lumes forestais tirando
proveito das máis avanzadas tecnoloxías aeroespaciais, robóticas,
industriais e dixitais. No informe dado a coñecer polo grupo de
investigadores que dan forma a Fire-RS (a Agrupación Aeroespacial e
o grupo CIMA da Universidade de Vigo) constatouse a total
efectividade da tecnoloxía para mapear e predicir o comportamento
dos incendios, poñendo en xogo recursos que combinan sensores
infravermellos, o cubesat Lume-1, drons e un software de modelado.
Fire-RS
(WildFire Satellite and UAV Remote Sensing System),
como lembraremos, púxose en marcha en 2016 do ano pasado, coordinado
pola Agrupación Aeroespacial e o grupo CIMA da Universidade de Vigo
e coa participación da Universidade de Porto e do Centro Nacional
para a Investigación Científica de Toulouse. O seu impulso responde
á necesidade de buscar novas maneiras de enfocar a loita contra os
incendios, agravados polo cambio climático e a proliferación de
especies pirófitas como o eucalipto, procurando minimizar os seus
efectos sobre a poboación e o medio ambiente.
Financiado
polo programa europeo Interreg cun orzamento de 2,1 millóns de
euros, fronte aos sistemas actuais que empregan modelos que non son
quen de recoller datos de xeito continuo, Fire-RS permite obter datos
reais recollidos in situ e de xeito automatizado para avaliar a
evolución e propagación real dun lume.
Transcorridos
tres anos desde o seu inicio, este mércores o equipo de
investigación implicado neste proxecto presentou o balance do seu
traballo. Segundo explicou o profesor Fernando Aguado, investigador
principal, o proxecto acadou a integración de múltiples tecnoloxías
para facilitar a loita contra o lume, “cumprindo así cos
obxectivos definidos”, que buscaban acadar predicións exactas da
evolución dos incendios, baseadas en datos reais recollidos a pé de
campo e de xeito automatizado.
No
acto de presentación dos resultados, o reitor, Manuel Reigosa,
salientou o potencial dunha iniciativa que xunta aspectos “dos que
estamos moi satisfeitos tanto dende a Universidade de Vigo como dende
a sociedade galega”, entre eles a aposta pola colaboración tanto
internacional como público-privada; o fornecemento de capacidade
tecnolóxica cara o tecido industrial; ou a creación de spin-off,
coa posta en marcha de Alén Space.
Segundo
se explicou, a tecnoloxía do proxecto Fire-RS desenvólvese en tres
fases. Na primeira delas, a Universidade de Vigo deseñou e
desenvolveu o sistema de detección en terra, integrado por sensores
infravermellos e estacións meteorolóxicas; así como do satélite
Lume-1, encargado de recoller e reenviar as alarmas xeradas polos
vixías en terra. Na segunda fase, o Laboratorio de Análises e
Arquitectura de Sistemas de Toulouse simula a evolución do lume e
xera un plan de voo efectivo e optimizado para que os avións non
tripulados sigan unha traxectoria definida sobre a área do incendio
co obxectivo de recoller máis información in situ. Xa na terceira
fase do proxecto, o equipo da Universidade de Porto encárgase de
despregar varios vehículos non tripulados que sobrevoan a área do
incendio, seguindo o plan de voo xerado polo software de Intelixencia
Artificial, co obxectivo de recoller os datos necesarios para obter a
propagación real do lume.