A UVigo, Bahía, 10 METS e Imaxin achegan tecnoloxía para axudar a doentes de COVID persistente
xoves, 1 de decembro do 2022
O
Complexo Hospitalario Universitario de Ourense (CHUO) acolleu este
mércores 29 de novembro a presentación do Proxecto Coperia, tal
e como
avanzamos este mércores dende Código Cero, salientando que se
trata dunha iniciativa innovadora baseada na Intelixencia Artificial
que busca poñer ao alcance da cidadanía as ferramentas máis
punteiras para a abordaxe da COVID persistente, unha doenza que
afecta a dúas de cada dez persoas de coronavirus tras unha infección
aguda (calcúlase que até 27.000 pacientes en Galicia e máis de
800.000 no territorio estatal). Coperia, nun plano máis concreto,
está orientado ao desenvolvemento e validación clínica dunha
plataforma multidisciplinar e integral baseada en IA para o
diagnóstico, apoderamento, rehabilitación holística e
personalizada, así como a xestión clínica de doentes afectados por
COVID persistente.
Na
presentación da iniciativa, en
cuxo desenvolvemento participan varios grupos de investigación da
Universidade de Vigo e un consorcio de catro empresas e
entidades, participaron o conselleiro de Sanidade, Julio García
Comesaña, e máis o xerente da área sanitaria, Félix Rubial, que
sinalaron que as secuelas da “COVID supoñen un desafío ao que
temos que facer fronte, e este proxecto servirá de estímulo para
seguir avanzando na súa abordaxe”.
Comesaña
salientou o esforzo que permitiu dotar a esta iniciativa dun
orzamento de máis de 700.000 euros, coa conseguinte implicación da
Axencia Galega de Innovación, co co-financiamento do programa
operativo FEDER Galicia 2014-2020, no eixo REACT-UE, como parte da
resposta da Unión Europea á pandemia da COVID.
Segundo
o conselleiro, Coperia promove o apoderamento dos pacientes “a
través de ferramentas que lles resulten útiles no seu día a día”.
Entre estes recursos destaca o uso de xogos para o móbil que
maximizan o seu adestramento, no tocante á rehabilitación
cognitiva.
Tamén
salienta un sistema innovador que contribúe á monitoraxe en remoto,
de cara á rehabilitación física, evitando desprazamentos ao centro
hospitalario. O proxecto ten entre outras capacidades a de aprender
aos usuarios a reportar un evento de fatiga para traballar na
predición do limiar de exercicio que pode producirlles o episodio.
Consorcio
empresarial
O
consorcio do proxecto está formado por Bahía Software, 10 METS,
Imaxin Software, a Fundación Biomédica Galicia Sur e, por parte da
Universidade de Vigo, o Grupo de Tecnoloxías Multimedia (GTM), do
Campus de Vigo, e o Laboratorio de Informática Aplicada (LIA2), do
Campus de Ourense, liderando esta participación académica Carmen
García Mateo, Laura Docío e Xosé Antón Vila.
As
pemes e organismos de investigación implicados en Coperia, cuxo
investigador principal é o doutor Alejando García, traballan para
desenvolver unha plataforma que permita o cribado de pacientes con
COVID persistente; axudar aos pacientes a anticipar gromos de
síntomas incapacitantes; potenciar e desenvolver novas ferramentas
de rehabilitación personalizadas, e facilitar a xestión diaria dos
pacientes por parte das e dos profesionais. O proxecto foi presentado
a nivel de servizos centrais do SERGAS e desenvolvido en colaboración
cos profesionais do Complexo Hospitalario Universitario de Ourense,
onde xa está en marcha o recrutamento de pacientes.
A
nivel tecnolóxico, Coperia combina varias tecnoloxías prioritarias
para o desenvolvemento de Galicia asociadas ao sector TIC e
biotecnolóxico. Así, recóllese no proxecto, “impúlsase un
enfoque multidisciplinar e innovador, no que se traballará con
pacientes reais para combinar datos proteómicos, datos de voz, datos
de factores cardíacos, condutividade cutánea e avaliación
cognitiva. Nesta iniciativa, a I+D céntrase en modelos de algoritmos
de aprendizaxe automática e modelos probabilísticos de pequenos
conxuntos de datos. Debido á complexidade dos datos, as técnicas de
IA tamén serán necesarias para predicir, recomendar e axudar aos
pacientes”.