A USC traballa na creación dun programa de ensino superior sobre Blockchain
mércores, 15 de abril do 2020
- Unha das sesións do proxecto internacional interuniversitario para impulsar a docencia en cadea de bloques
En
tempos de urxencia sanitaria a nosa comunidade investigadora e
innovadora prosegue co seu importante labor de facer avanzar o
progreso tecnolóxico. A Universidade de Santiago é un exemplo
disto. Unha das frontes activas nas que traballa a día de hoxe está
estreitamente relacionada coa seguridade para as novas contornas
económicas, financeiras e produtivas que nos agardan, cada vez máis
envorcadas nos ámbitos tecnolóxicos. Estamos a falar do
proxecto europeo DLT4All, que se dirixe a crear un programa de
ensino superior en materia de cadea de bloques: a tecnoloxía
Blockchain. Trátase, sinala a USC, de desenvolver “un
programa académico que se adapte ás necesidades do mercado”.
Para
poñernos en situación, os integrantes do equipo compostelán que
traballo na iniciativa internacional DLT4All lembran que as
tecnoloxías Blockchain son recursos en clara proxección, que
están a gañar importancia en diferentes sectores para garantir a
protección de datos e a confidencialidade e seguridade dos procesos
en diferentes sectores como o bancario, educativo, sanitario, etc.
A
cadea de bloques, para quen non o saiba, son libros de contabilidade
electrónicos para seren compartidos abertamente por moreas de
usuarios e que gravan todas as transaccións que se apuntan neles e
sen que haxa xeito de modificalas, polo que se poñen en xogo
importantes factores de seguridade e protección. Amais, a tecnoloxía
Blockchain está na orixe e no impulso das moedas virtuais.
O
devandito proxecto europeo está sendo xestionado polo Servizo
de Relacións Exteriores, liderado por Manuel Fernández Grela,
profesor titular do Departamento de Fundamentos de Análise Económica
da Facultade de Ciencias Económicas e Empresariais da USC.
Os
seus obxectivos específicos son os seguintes:
·
Crear un programa de ensino superior baseado no Blockchain que
posibilite impartir formación de alta calidade neste eido concreto
tanto na USC como noutras universidades europeas.
·
Dar resposta ás necesidades do mercado e facer converxer disciplinas
de diferentes titulacións como matemáticas, informáticas e
economía.
·
Involucrar aos beneficiarios potenciais do programa nun proceso de
co-creación do seu deseño, elaborado tanto dende a Universidade
como dende o mundo no que se manexan estas tecnoloxías, para que o
produto educativo final se axuste á demanda e necesidades dos
emprendedores e investidores.
·
Achegar novas formas de ofrecer formación de alta calidade no campo
das tecnoloxías Blockchain e DLT construíndo un
conxunto de casos de estudio que fagan factíbel transmitir os
conceptos dunha forma efectiva no contexto dun módulo de
aprendizaxe. Segundo informa o Servizo de Relacións Exteriores da
USC, “na actualidade moitas universidades europeas están
interesadas na tecnoloxía Blockchain, pero os seus
programas carecen dun número suficiente de casos reais para realizar
unha análise”.
Estado
actual do proxecto
O
proxecto arrancou coa celebración de oito Blockchain Labs
en xuño de 2019 nos 5 países socios do proxecto (Bélxica, Chipre,
España, Grecia e Italia) nos que participaron profesionais de perfís
diversos como investigadores, emprendedores, investidores, xestores
de incubadoras de empresas e estudantes. Respecto do desenvolvemento
futuro do programa, realizarase un test piloto con dúas vertentes:
un módulo de 40 horas para o mundo académico e máis un módulo de
20 horas dirixido ao mundo empresarial. Logo levaranse a cabo grupos
de discusión con diferentes públicos obxectivo.