A USC, referente a nivel mundial en difusión científica a través do modelado 3D
xoves, 5 de xaneiro do 2017
O
campionato científico escolar D3Mobile
Metrology World League 2017, do que falamos hai pouco dende
Código Cero con motivo da presentación en Lugo da súa máis
recente convocatoria (a deste ano entrante), está a servir non
só para potenciar vocacións tecnolóxico-dixitais entre a nosa
mocidade (e a mocidade internacional) senón tamén para visualizar
perante o mundo o importante traballo dos investigadores do Campus de
Lugo e, por enteiro, da Universidade de Santiago. Segundo
vén de informar a USC, a institución académica foi quen de
converterse, grazas ao dito certame, na primeira universidade que
aposta polo modelado 3D como vía para difundir e dar a coñecer
o labor científico que desenvolven os seus grupos.
Como
lembraremos, o campionato é unha iniciativa baseada no emprego dos
móbiles e as tabletas como ferramentas de deseño avanzado en tres
dimensións. A liga vén da man do grupo USCAN3D da USC, Campus de
Lugo, que como dixemos abriu recentemente a súa quinta edición.
O
certame foi concibido, en palabras dos organizadores, como “unha
experiencia educativa en liña que persigue a estimulación do que se
coñece como competencias STEAM (Ciencia, Tecnoloxía, Enxeñaría,
Arte e Matemáticas) entre o alumnado de 12 a 18 anos”. Esta
vontade de salientar a comunicación investigadora materializouse coa
presente edición, a de 2017, na posta en marcha dun galardón
específico destinado a difundir “os resultados de investigación
dun científico, centro ou equipo de investigación da USC, así como
na implantación dun premio semellante orientado á divulgación da
ciencia no contexto español”. A idea, a maiores, é impulsar a
transferencia de coñecemento de xeito colaborativo entre a
universidade compostelá e os estudantes e docentes que participan
neste campionato internacional.
Segundo
engade a USC, as persoas interesadas en participar na quinta edición
de D3Mobile poden formalizar a súa inscrición de balde ata o 14 de
marzo de 2017 na web deste campionato, d3mobile.es,
onde tamén poderán atopar cumprida información sobre os
requirimentos establecidos, prazos e galardóns establecidos para os
distintos equipos gañadores.