A USC publica un libro que analiza o sexismo nos videoxogos
xoves, 25 de outubro do 2012
Hoxe presentouse
en Santiago de Compostela un novo libro do Centro Interdisciplinario de
Investigacións Feministas e de Estudos de Xénero (CIFEX) resultante dun
proxecto de investigación no que se analizaron os roles de sexo entre máis de
4.000 estudantes galegos de 4º de ESO durante o período 2009-2010. Este volume
coordinado por Jorge García Marín leva por título Postmodernidade e novas redes sociais, e serve de análise do
consumo diferencial por sexo dos videoxogos e da violencia simbólica
transmitida por estes a través das súas narrativas e dos seus personaxes. O
equipo tras o proxecto de investigación reclama aos educadores que potencien “o diálogo fronte ao espectáculo ,
entendidos como opostos, e que ao mesmo tempo saiban aproveitar as condicións
que impoñen as novas tecnoloxías”.
Este libro pode adquirirse
en formato impreso por 10 euros, agardándose en breve a súa edición
en formato dixital a un prezo máis axustado.
- A directora do CIFEX, Rita Radl; a concelleira de Familia, Benestar social, Muller e Emprego de Santiago, Paula Prado; o reitor Juan Casares; o director do Servizo de Publicacións da USC, Juan L. Blanco Valdés; e o coordinador da edición, Jorge García Marín, durante a presentación do volume
