A USC participa nas xornadas sobre libros electrónicos da Unión de Editoriais Universitarias
xoves, 6 de xuño do 2013
- O director do Servizo de Publicacións da USC, Juan Blanco Valdés, achegará a súa visión sobre a publicación dixital nestes encontros
A Universidade de
Santiago está a participar directamente na celebración das
terceiras Xornadas
sobre libro electrónico que organizan en Madrid, até mañá,
a Unión de Editoriais Universitarias Españolas (UNE) e máis o
Centro Superior de Investigacións Científicas (CSIC). Máis polo
miúdo, a
achega da USC vén da man do seu director do Servizo de Publicacións,
Juan Blanco Valdés, que participa como relator fornecendo a súa
visión sobre até onde poden chegar as bibliotecas e editoriais no
contexto dixital. Nesta intervención, máis polo miúdo,
proporcionará elementos para a reflexión e o debate acerca de como
se teñen modificado no actual escenario dixital as responsabilidades
e límites operativos que dende antigo correspondían nas
universidades aos administradores de contidos (bibliotecas) e aos
produtores de contidos (editores).
Juan Blanco, informa a
USC, reflexionará sobre como “algúns desenvolvemento
tecnolóxicos (OJS, OMP) conducen, incluso, a esvaecer
estes límites, ao substituír ao produtor de contidos
como administrador dos mesmos”. Por outra banda, na opinión do
director de Publicación da USC, “o contexto actual salienta
a necesidade de canalizar o intercambio universitario de libros
dixitais, como forma de asegurar a súa presenza nas bibliotecas
universitarias, a través de solucións tecnolóxicas compartidas e
axeitadas”.
Ao carón do
representante da USC, a directora da Biblioteca da Universidade de
Complutense, Manuela Palafox Parejo, explicará a transición ao
libro electrónico nas bibliotecas universitarias e, finalmente,
Ángel Redero Hernández, de Ediciones Universidade de Salamanca,
exporá o caso de EUSAL na Plataforma Cielo, desvelando as vantaxes e
problemas desta experiencia.