A USC organiza un curso en liña sobre financiamento de empresas de base tecnolóxica
mércores, 12 de xuño do 2013
A Universidade de
Santiago está a apostar por canles innovadoras para contidos
innovadores. Un
exemplo disto é o seu curso Financiamento de Empresas de Base
Tecnolóxica, unha actividade formativa con xanelas ao futuro
do noso tecido produtivo que se sustenta sobre un dos grandes
alicerces dese futuro: as redes. O curso en liña vai dirixido a quen
teña en mente un proxecto tecnolóxico de vangarda (novos
empresarios ou a piques de selo), persoal técnico que realice
asesoramento nas Oficinas de Transferencia de Resultados de
Investigación, así como a todas aquelas persoas “que vexan nestas
empresas unha ferramenta de axuda para desenvolver o seu negocio”,
informa a USC.
O curso ten unha carga
lectiva de 40 horas e virá da man de David Calvo Mallón, formado no
eido da banca e as finanzas e con experiencia profesional na xestión
empresarial destes e outros sectores, máis polo miúdo como analista
de investimentos e con experiencia directiva nunha compañía de
telecomunicacións. As persoas interesadas poderán inscribirse ata o
próximo 18 de xuño. Poden atopar máis información na
web de Uniemprende ou solicitala a través do correo electrónico
uniemprende@usc.es e do teléfono 881 815 563.
Esta acción formativa,
informa a USC, analizará as características e problemáticas das
empresas de base tecnolóxica nas súas fases iniciais, “ademais
de introducirse nos contidos principais dun plan de
empresa e o seu enfoque como ferramenta para a obtención de
financiamento e amosar as distintas alternativas de financiamento
existente con especial atención ao capital risco, características e
mecanismos de actuación”.