A USC mostrará nunha xornada como impulsar os resultados de investigación a través de IA
luns, 15 de xaneiro do 2024
O 24 de xaneiro toca
falar de Intelixencia Artificial e das posibilidades que a IA ofrece
para identificar oportunidades e impulsar os resultados de
investigación. Esta
será a cerna da xornada da USC Como impulsar os resultados de
investigación da IA, dirixida tamén a “fomentar a
colaboración entre diferentes áreas de investigación da
Universidade de Santiago”. A sesión desenvolverase na Facultade de
Ciencias da Comunicación da USC de 12.00 a 14.30 horas. A inscrición
pode formalizarse a través dun formulario
en liña ata o 22 de xaneiro.
Carles Sierra, director do Instituto de
Investigación en Intelixencia Artificial do Consello Superior de
Investigacións Científicas (CSIC) e da Universidade Autónoma de
Barcelona; María José Carreira, investigadora do Centro Singular de
Investigación en Tecnoloxías Intelixentes da USC (CiTIUS) e Antonio
Artés Rodriguez, socio fundador de EB2, spin-off da Universidade
Carlos III de Madrid serán os relatores nesta xornada.
A xornada está enfocada en fomentar a hibridación
de resultados de investigación, poñendo o foco na área de Ciencias
Sociais e Humanidades coa Intelixencia Artificial. O obxectivo deste
encontro é coñecer casos de éxito que sexan exemplos desta
hibridación e, por outra parte, fomentar a colaboración entre
diferentes equipos de investigación da USC.
Está dirixida principalmente a persoal
investigador dos diferentes centros de investigación en Ciencias
Sociais, Humanidades e de Intelixencia Artificial da USC. Ademais, as
persoas participantes que así o desexen terán a oportunidade de
presentar os seus proxectos en formato elevator pitch.