A USC avanza na xestión dos seus trámites coa presentación da súa Sede Electrónica
xoves, 11 de xullo do 2013
- De esquerda a dereita, Andrés Freire, Benita Silva, Juan Casares, Lourdes Noya e Lourdes Batán. Imaxe de Alfonso-Servimav
A Universidade
de Santiago presentou este xoves a súa Sede
Electrónica, unha oficina virtual de atención permanente aos
usuarios que entrou en funcionamento o 17 de xuño e estará rematada
en setembro do 2015. Un dos seus principais obxectivos será o de
evitar o desprazamento dos usuarios na realización dos seus
trámites. De feito, tódalas xestións da USC poderanse realizar a
partir de agora a través de Internet coa mesma validez que de xeito
presencial, unificando e facilitando o acceso a tódolos servizos.
Polo tanto, poderase ter
acceso á información dos procedementos, desenvolver trámites ou
presentar documentos no rexistro electrónico, así como formular
queixas e suxestións, consultar o taboleiro de anuncios da USC ou
verificar documentos electrónicos expedidos pola Universidade. O
director da Área TIC da Universidade de Santiago de Compostela,
Andrés Freire, distinguiu entre os puntos principais desta
iniciativa a facilidade para a identificación e o recoñecemento de
tódolos servizos que ofrece a sede electrónica, e o calendario que
ofrece a Universidade que completa o catálogo de servizos.
De acordo coas propias
palabras do reitor, Juan Casares Long, esta é unha ferramenta
fundamental para dispoñer dun único punto de acceso que incorpore
novos procedementos a disposición de tódolos cidadáns. “O que
cambia é o paradigma de relación entre o alumno e a Universidade,
mellorando a accesibilidade e a prestación do servizo”,
afirmaba o responsable da Unidade de Xestión Académica Ramón
García Rey.